Охрид

Туристичките работници се фалат, домашните туристи се жалат - така изгледа годинешната летна сезона во Охрид. Овие денови нашиот најпознат туристички центар буквално е окупиран од туристи од земјава, од поранешните југословенски републики, но и со гости и од соседна Албанија. За жал, бранот поскапувања, кој се смета за глобален феномен, ги принуди и охриѓани да ги зголемат цените. Некои тоа го направија во подносливи граници, но други ги изедначија цените со тие во приморските туристички центри во регионот. Според првичните согледувања на статистичарите за третиот квартал од годинава, Охрид годинава е за 43 отсто поскап од лани.
Нереалните поскапувања ги критикува и охридскиот градоначалник Александар Петрески.
- Хотелите и рестораните претераа со цените. Да отидеш на Палма де Мајорка ќе поминеш поевтино отколку во Охрид. Приватниот сектор не треба наеднаш и вртоглаво да ги зголемува цените, зашто така ќе ги загубиме гостите што традиционално летуваат во Охрид.
Ручек за двајца во охридските ресторани чини и до 50 евра. Дерат и кафулињата и шанковите покрај плажите. Нес-кафе чини 100 денари, сок од 0,25 милилитри најмалку 90 денари, коктел „мохито“ 220 денари, пиво „хајнекен“ 140 денари, „скопско“ 100 денари и макијато - 80 денари. Некои туристи велат дека цените се реалност, но други забележуваат дека, сепак, се надуени, бидејќи охриѓани сакаат да профитираат за време на летната сезона. Највидливи се поскапувањата во локалните минимаркети, кафулињата и на шанковите покрај плажите.
- За на плажа треба да потрошите пари како да сте во Грција или во Турција. Ама таму плажите се многу средени и чисти, за разлика од охридските. А цените од ден на ден растат - се жали скопјанката Теодора Димовска.
Ако се возите со брод од Канео до градското пристаниште, тура што трае не повеќе од 5 минути, ќе платите 50 денари по човек. Сендвичите кои во мај чинеа 70 денари, сега поскапеа до 150 денари. Лежалка на плажа се изнајмува по цена од 100 до 200 денари, а таму нема пепеларници ниту канти за отпадоци. Паркинг-просторот во центарот на градот е со ланските цени. Еден час чини 50 денари. И цената на такси-превозот не е променета, но таксистите не ве качуваат во автомобил за пократка релација. Најголем дел од плажите немаат доволно паркинг-простор.
- Фискални сметки најчесто не даваат, се се сведува на старите парагон листови. Ако сакате да нарачате помфрит, во повеќето сендвичарници нема да добиете, бидејќи ве принудуваат да купите и сендвич. Ова не е добар однос кон туристите - вели тетовецот Ристо Аврамовски.
Туристите се жалат и на градската автобуска станица, а пред неа приватните издавачи на станови неретко ги дезинформираат муштериите, нудејќи им ја периферијата како центар. Скопјанката Виолета Трпевска вели дека таа и нејзиното семејство лани за 400 денари по кревет нашле сместување во Турското Маало во Охрид.
- Годинава за истите пари не можам да се сместам поблиску од 2 километри од центарот на градот. Цените, посебно за 2 август, беа превисоки и достигнува и до 1.000 денари за кревет. Најпросто речено, ова е лудило - вели Трпевска.
Сместувањето што лани чинеше 300 денари, овој месец достигна цена и до 600 денари. А апартманите што лани беа околу 1.200 денари, сега се издаваат по 50 евра. Туристите забележуваат дека за повисоката цена за сместувањето не добиваат подобри услови за сместување.

Ѓубре на сите страни


Туристите што останаа во Охрид по Илинден реагираат дека градот изгледа како да не е исчистен воопшто. Во локалната самоуправа објаснуваат дека контејнерите се празнат по пет пати во денот, но тоа не се познава.
- Обезбедивме повеќе возила и луѓе, за да можеме повеќе пати во денот да ги празниме контејнерите, но свесни сме дека и тоа не го решава проблемот. Апелираме до туристите, но и до домашните, ѓубрето да го изнесуваат на улица кога поминуваат ѓубреџиите - вели Александар Петревски, градоначалник на Охрид.