Кактус

Opuntia-та спаѓа во групата на кактуси-грмушки. Стеблата им се составени од елиптични, сплескани и меснати делови, кои често се големи и до половина метар. Розеви или жолти крупни цветови со бројни латици се развиваат по горниот раб на гранката во периодот од мај до јули. Во есен созреваат големи како јајце, сочни, црвени, жолти или розеви плодови, кои како и целата билка се обраснати со бодликави влакна.

Месото од зрели плодови е вкусно, слатко-киселкасто, сочно и се јаде сирово. При берењето и користењето треба да се внимава на боцките на кората на плодот. Најдобро е да се берат со ракавици, потоа плодот да се зареже по должината и да се извади сочниот и мек дел. Од плодовите може да се прави џем и мармалад.

Стеблото може да се пече на скара, како шницли (при печењето боцките се отстрануваат), додека цветовите се подготвуваат како шпаргла.