Салати

Салата од цвекло

Потребно:

* 1 кг цвекло
* сол
* 3-4 лажици вински оцет
* 2 чешниња лук
* малку шеќер

Приготвување: варете го измиеното цвекло 60 минути на тивок оган. Откако ќе се излади, излупете го, па изрендајте го на крупно ренде. Истолчете го лукот, па додајте го во ренданото цвекло. Зачинете го цвеклото со сол, шеќер и со оцет. Вака подготвената салата изладете ја, па послужете ја. Место лук, може да употребите рендан рен.

Салата со цвекло и со целер

Потребно:

* 500 г цвекло
* 4 гранчиња целер
* китка младо кромитче
За преливот:
* сол
* 1 лажица јаболков оцет
* 50 мл масло
бибер
* 2 лажици ситно сечкан магдонос

Приготвување: цвеклото излупете го и изрендајте го на крупно ренде. Гранчињата целер исечете ги на тенки тркалца, а младото кромитче ситно исечкајте го. Сето тоа измешајте го. Солта измешајте ја со оцетот, маслото, биберот и ситно исечканиот магдонос. Течноста добро измешајте ја, а потоа со неа прелијте ја салатата.

Салата на руски начин

Потребно:

* 200 г моркови
* 350 г јаболка
* 350 г трупка
* 3 лажички шеќер
* сол
* 200 г кисела павлака

Приготвување: морковите, јаболката и трупката излупете ги и изрендајте ги на поситно ренде. Додадете ги шеќерот, солта и киселата павлака. Сето тоа добро измешајте го и оставете го да се излади. Салатата послужете ја како ладно предјадење.

Ароматични печени пиперки

Потребно:

* 600 г печени црвени пиперки
За маринадата:
* 4 лажици маслиново масло
* 1/2 лажичка сечкан свеж рузмарин
* 1 гранче босилек
* малку сува мајчина душица
* 2 чешниња лук

Приготвување: излупете ги печените пиперки и наредете ги во чинија за послужување. Измешајте го маслиновото масло со рузмаринот, ситно сечканиот босилек, мајчината душица и со истолчениот лук. Вака приготвената маринада прелијте ја врз пиперките.

Мешана салата од праз

Потребно:

* 2 страка праз (само белиот дел)
* 4 домати
* 3 варени јајца
* 100 г шунка
* 50 г ементалер
За преливот:
* 300 мл јогурт
* 2 лажици масло
* 2 лажици сенф
* бибер
* малку шеќер
* 1 китка сечкан магдонос

Приготвување: исчистениит праз исечете го на тркалца. Доматите, тврдо варените јајца и шунката исечете ги на коцкички и измешајте ги со празот. За преливот добро измешајте ги сите состојки, па прелијте ја салатата.

Салата со туна

Потребно:

* 300 г спирални тестенини
* 200 г мали домати
* 200 г моцарела
* 100 г зрна од пченка
* 1 конзерва туна
* 50 мл маслиново масло
* 4 лажици јаболков оцет
* сол
* бибер

Приготвување: тестенините сварете ги во поголемо количество солена вода. Исцедете ги и ставете ги во подлабок сад. Потоа во нив ставете ги исечените домати, зрната пченка, моцарела сирењето исечено на коцкички, исцедената туна, оцетот и маслото. Салатата зачинете ја со сол и бибер.