Името е се што имаме

СКАНДАЛОЗЕН ПРЕДЛОГ НА посредникот МЕТЈУ НИМИЦ

Новото име и во пасош

Нимиц предлага новото име што ќе се користи во сите меѓународни организации да се запише и во пасошите на македонските граѓани, а на државите што ја признале Македонија под уставното име им се сугерира да ја преиспитаат одлуката

Пет предлози за ново име на Република Македонија дал посредникот Метју Нимиц на последната рунда преговори, кои завчера се одржаа во Атина, дознава „Дневник“ од дипломатски извори. Никола Димитров, македонскиот претставник во преговорите, уште истата вечер на претседателот Бранко Црвенковски, премиерот Никола Груевски и на министерот за надворешни работи Антонио Милошоски им го претставил новиот пакет на Нимиц. Според нашите извори, овој предлог е уште понеповолен и од претходниот, кој македонските власти го оценија како „лош“. Од новиот предлог на Нимиц произлегува дека уставното име на земјава не ќе може да се употребува ни дома. „Второто име“, кое треба да важи за билатерална комуникација со Грција и во сите меѓународни организации, треба да биде напишано и во пасошите на македонските граѓани. Според дипломатите, тоа значи дека тоа „второ име,“ всушност, ќе ни стане едно и единствено. Дипломатите велат дека Нимиц поставил уште една опасна дипломатска стапица за Македонија, бидејќи на сите држави што ни ја признале државата под уставното и историско име „им сугерира“ да ја преиспитаат таквата одлука.  Од сето тоа произлегува дека се заговара едно име и за домашна, и за билатерална и за меѓународна употреба. За таа цел Нимиц ги предложил следниве имиња: Демократска Република Македонија, Република Горна Македонија, Нова Република Македонија, Независна Република Македонија и Уставна Република Македонија. 

Македонските власти доцна прексиноќа и вчера претпладне го разгледувале новиот предлог на американскиот посредник во спорот за името. - Го анализираме предлогот на медијаторот Метју Нимиц и ги подготвуваме сите детали и комбинации и се' што може да произлезе од него. Веќе сме при крај со оформувањето на првичниот став. За тоа ќе разговараме и со другите фактори во државата, по што ќе ги презентираме резултатите - изјави вчера премиерот Никола Груевски.  Тој за планот на Нимиц ќе ги извести и лидерите на сите политички партии, а на таа средба ќе биде поканет и претседателот Црвенковски. Груевски вели дека се' што е негативно во предлогот на Нимиц, Македонија нема да го прифати и категорично ќе го одбие.Посредникот на ОН, американскиот дипломат Нимиц, смета дека неговиот предлог е фер и оти го зачувува уставното име на Македонија. Тој предвидува можност и двете земји да може да го користат терминот Македонија во комерцијални и други цели затоа што и двете земји се наоѓаат на територија на „стара Македонија“. Тоа значи дека Грција ќе може да го употребува името Македонија и во своите територијални единици како што е, на пример, Централна Македонија или Комора на Централна Македонија.

GRCIJA NEMA NIKAKVO PRAVO NA NASHETO IME......TAA SI IMA IME.....

KOLKU LI USHTE IMINJA SAKA DA IMA I KORISTI?????? 

Вашингтон ја менува реториката за НАТО

Роберт Гејтс го пречекува Лазар Еленовски пред Пентагон

Сигурната Хрватска лобира Македонија и Албанија да и' се придружат во Алијансата

Од нашиот известувач
Борис Георгиевски

Оклахома сити - Го менуваат ли САД речникот во пресрет на долго најавуваното и планирано проширување на НАТО со три нови земји-членки Македонија, Албанија и Хрватска? Досега традиционално повторуваната реченица: САД би сакале сите три земји-членки на Јадранската група да добијат покани на претстојниот самит во Бук*решт, не се слуша толку често последниве денови од претставниците на американската администрација. Напротив, се' почесто се потенцира дека одлуката за тоа кој ќе добие покана за членство во НАТО се' уште не е донесена. Резервираноста во Вашингтон во однос на квантитетот на идното проширување на Алијансата, вчера делумно ја потврди и хрватскиот министер за одбрана, Бранко Вукелиќ.

Од вторничката куса средба на министрите од трите земји од А3- групата со американскиот министер за одбрана, Роберт Гејтс, во Вашингтон, од Пентагон излезе само штуро соопштение во кое беше наведено дека било разговарано за проширувањето на НАТО, одбранбените реформи кои ги спровеле Македонија, Албанија и Хрватска, и состојбите во Косово и Авганистан. Со ниту еден збор не беше спомната поддршката на САД за нивниот прием во Алијансата, нешто што, барем во изминативе месеци беше редовна практика кога е во прашање Вашингтон.

Портпаролот на Пентагон, Џеф Морел, по средбата ги наброја темите за кои се дискутирало, но не прецизираше ништо во однос на шансите на земјите за добивање на посакуваната покана. Морел ги пофали Македонија, Албанија и Хрватска дека нивниот придонес во воените мисии на Алијансата е далеку над нивните реални можности.

Според она што го кажал министерот Лазар Еленовски за македонската програма на Гласот на Америка, главната порака од Гејтс до Македонија била дека земјата „во одбранбениот дел ги исполнува целосно критериумите, и повеќе од тоа“.

Најрасположен за изјави по средбата со секретарот Гејтс, беше хрватскиот министер Бранко Вукелиќ, но токму неговите изјави оставија најмногу простор за двоумење. Вукелиќ во неколку наврати, во изјава за хрватската програма на Гласот на Америка, повторуваше дека Хрватска би сакала да ги види сите три земји од Јадранската група како идни членки на НАТО. Тој очекува неговата земја сигурно да добие покана на самитот во Бук*решт, но рече дека за иднината на регионот најдобро е и Македонија и Албанија, исто така, да влезат во Алијансата.

„Одлуката за прием во НАТО се' уште не е донесена. Затоа на состанокот со министерот Гејтс неговата порака беше да се продолжи со контактите со сите земји-членки на НАТО. Верувам дека поканата ќе биде упатена до сите три земји. Тоа е важно за стабилноста и безбедноста на целиот регион, особено во контекст на случувањата и актуелната криза на Косово. Мислам дека е многу важно за понатамошниот развој, за безбедносните услови и за сите демократски процеси во нашиот регион, сите три земји да добијат покани“, потенцираше Вукелиќ.

И портпаролот на Стејт департментот, Шон Мекормак, беше претпазлив кога на редовната прес-конференција во вторникот говореше за проширувањето на НАТО.

„Во овој момент нема конечна одлука. Во тек се разговори со неколку земји, без разлика дали станува збор за кандидати за членство или пак за земји кои посакуваат членство во Акциониот план, на кои им објаснуваме што треба да сторат за да ги исполнат условите за членство. Никој нема да го симне прагот за која било од овие земји, и ние, исто така, ќе донесеме одлука откако ќе процениме дали овие земји се подготвени за повисоко ниво на асоцијација со НАТО. Исто така, ќе се консултираме и со нашите сојузници. НАТО е организација во која одлуките се носат со консензус, што значи дека ќе мора да постигнеме консензус за секое индивидуално прашање за секоја земја- кандидат“, рече Мекормак.

Според она што речиси секојдневно го повторуваат македонските претставници, единствената пречка за приемот на Македонија во НАТО е противењето на Грција. Резервираноста во американската администрација, веројатно е резултат и на проблемот со името. Лобирањето на Загреб, покрај Хрватска да добијат покани во Бук*решт и Македонија и Албанија, се надоврзува на процените на дипломати на НАТО кои од Брисел за „Утрински весник“ неодамна изјавија дека доколку приемот на Македонија биде блокиран, од трката за НАТО, најверојатно, ќе испадне и Албанија.

Покрај Хрватска, за приемот на трите земји во Алијансата деновиве лобираше и Ричард Лугар, лидер на Републиканската партија во Одборот за меѓународни односи во американскиот Сенат. Сенаторот Лугар ја повика својата влада да обезбеди прием на Хрватска, Македонија и Албанија во НАТО.

„Овие три земји се наоѓаат на критички важна геостратегиска локација и се во најдобра можност да спречат евентуални обиди за дестабилизација на регионот преку насилство“, порача Лугар.

 NE za NATO!!!!!!!!!!!!! f**k OFF