ВЕРСКИ ВЕСТИ

Во битолско Кравари попот не дошол да венчава

Пеце Стефановски	Коментари (1)

Пукна резил во битолското село Кравари, бидејќи парохискиот поп Петре Пусевски вчера никаде го немаше и на селаните, за малку ќе им расипеше две свадби, а младенците ќе останеа без црковен благослов.

Венчавките требало да се одржат во селската црква, а со попот биле закажани уште пред две недели. Откако нервозните сватовите се изначекале по неколку часа, младенците отишле на венчавка во Битола, а другите гости во рестораните, со саати ги чекале зетот и невестата. Кај Најдовци кои донесоа млада невеста од Скадарско во Албанија, весело не пречекаа, ама се лути на селскиот поп.

„Младите знаеш дека се нервозни. Не дојде, не дојде, ако има поп друго место, зошто да не. Ама ние тука си живееме, нашата црква е овде и тука сакавме да ги венчаме“, рече денеска свекрвата Стеванка Најдовска.

„Тој не е стабилен поп тој е недобар, пијаница. И друг пат се има случено да креваме леб на гробишта, а него го нема“, вели младенецот Љупчо Најдовски.

Од црковниот одбор на село Кравари велат дека владиката Петре не ги поддржува селските цркви и целосно ги запоставува,пуштајќи им недисциплинирани попови што не може да ги контролира. Питропот Борис Крстевски, кој над две децении е прв човек на црковниот одбор, вели дека досега заради недисциплина сменил 12 попови.

„Овој поп скоро шест години е овде. Јас имав некоја иницијатива за да се смени, ама има некои од одборот што се двоумат. Ова не е прв пат ова што го прави. Има многу вакви неубави работи направено“, рече денеска селскиот питроп Борис Крстевски.

Од битолската митрополија нема коментари и допрва ќе го испитуваат овој случај. Во меѓу време, краварци никако не можат да го најдат парохискиот поп, за да разберат зошто не дојде на закажаните венчавки, а во среда ќе му кројат капа за негова смена.