Катар

Катарскиот авиопревозник според проценките на 18 милиони патници е најсигурен и најдобар избор за летање.

На годишниот меѓународен собир за воздухопловство "Farnborough", кој се одржува во Хемпшир, Велика Британија, катарскиот национален воздухопловен превозник "Qatar Airways" втора година по ред ја освои наградата за најдобра воздухопловна компанија во светот, како и наградите за најдобра авиокомпанија на Блискиот Исток и наградата за Најдобра услуга од персоналот за воздушните линии во Блискиот исток.

Наградата "Skytrax" се доделува врз основа на најголемото независно глобално истражување од страна на светската авијација, кое се спроведува во повеќе од 100 земји и опфаќа над 18 милиони патници.

"Ние сме многу горди на оваа награда затоа што ни ја доделуваат луѓето кои ги користат нашите услуги и летаат со нас.

Чувствуваме дека ги имаме исполнето нивните очекувања и ја имаме оправдано довербата која ја имаат во нас", изјави главниот извршен директор на "Qatar Airways", Акбар Ал Бакер. 

Тој дополни дека повторното освојување на наградата претставува уште поголем успех од првиот пат затоа што со тоа докажале дека не се "опуштиле" поради претходните пофалби.

"Qatar Airways" доживеа брз раст во 15-те години од своето постоење, а денес има флота од 109 летала и 117 дестинации низ Европа, Блискиот Исток, Азија, Пацификот и Северна и Јужна Америка.