Раси на кучиња и нивни карактеристики...

West Highland White Terrier

Или популарен како Вести, спаѓа во групата на мали кучиња. Достигнува величина од 28 цм, тежината варира помеѓу 7.5кг-8.5кг кај возрасните кучиња. Животниот век им е околу 14 год.

Историја на расата:

Потекнуваат од Шкотска и биле одгледувани за лов на лисици, видри и други штетници. Тие го делат своето потекло со многу други Шкотски Териери и биле официјално признаени како Западно Планински  Бел Териер во 1904 год.

Изглед:

Вести е компактно, куско и набиено мало куче со бушаво крзно.  Имаат малечки тркалезни носиња и мали подигнати уши.

Тие изгледаат многу слатко но силно,  и делуваат среќно додека горделиво се шетаат низ паркот.

Темперамент:

Вести се самоуверени мали кучиња, доста приврзани кон семејството но исто така се и добри чувари на домот бидејќи се доста бучни и храбри.

Нежни се по природа но можат да поднесат и доста долга и напорна игра,  така што тоа ги чини добри пријатели и сопатници.

Доста често знаат да наметнуваат доминантност со други кучиња затоа  Внимателно кога го запознавате со други.  Тие исто така ќе бркаат и мачки доколку не живееле со нив од рана возраст.

Чешлање:

Вести бараат минимално но редовно одржување на влакното, најпожелно еднаш неделно но  2-3 пати годишно,  крзното  треба да биде извлечено од професионалец (искубано, овој метод не боли, само се отстранува надворешниот слој за да може ново меко влакно да порасне, најчесто кај териерите со бушава длака)

Физичка активност:

Тие изискуваат значителна количина на вежби и најчесто им годат слободни долги прошетки без каиш.  Посебно внимание треба да се обрати на нивниот тренинг за одзив уште додека се мали се со цел да бидат послушни кога ќе ги повикате, оти знаат да бидат тврдоглави.

Здравствени проблеми:

Најчесто се здрави и ретко страдаат од болести.  Сепак расата има свои слаби точки а некои од нив најчесто страдаат од кожни заболувања и глувост.