Баскер фест

Плоштадот живее низ енергијата на „Баскерфест“

Плоштадот „Македонија“ деновиве целосно е обвиен во боите на седмото издание на интернационалниот фестивал „Баскерфест 2012“. Овој циркус под отворено небо претставува убава можност да се проследат низа возбудливи, духовити, музички и визуелни настани, атракции кои на центарот му даваат посебен шарм, а на посетителите им нудат големо количество позитивна енергија и забава. Меѓу „баскерите“ можат да се сретнат магионичари, танчари, кловнови, комичари, пантомимичари од Австралија, Канада, Аргентина, Полска, Нов Зеланд, САД, Ирска, Јапонија, Боливија, домашни артисти... 

Со активна програма до 10 јуни, посетителите од 18 до 2 часот по полноќ на четири локации на централниот плоштад, меѓу другото, ќе можат да одлучат дали да ги видат лудориите на Ирецот Чикен Џо, огнениот перформанс на нашите „Фајр меднес“, жонглирањето на Јапонецот Риуиносуке, брејкденсот на Американците „Би-екстрим“, 3Д-уметноста на Марга, а ќе можат да поиграат и џиновско „Не лути се човече“. Вечно жедните можат да се оладат со пијалак во „Пиво градината“, некои да танцуваат пред музичката сцена, да јадат од скараџиските штандови, да бидат дел од детските катчиња, или, пак, да понесат дома сувенир од малиот и разнобоен панаѓур со парчиња облека, накит, ракотворби, разна дрвенарија, играчки... Масовна радост за повеќе генерации