Закон за плаќање на многудетско мајчинство

Владиниот проект за зголемување на наталитетот, а кој требаше да профункционира од 1 јануари годинава, заглави уште на почеток. Досега ниту една брачна двојка што ги исполнува условите за помош од државата не зела ниту еден денар. Владата, пак, мината година речиси три месеци ја најавуваше кампањата за парична помош за семејствата што ќе добијат трето и повеќе деца во општините со наталитет помал од 2,1 промил. - Од 1 јануари сите невработени мајки што ќе родат второ и трето дете требаше девет месеци да добиваат надомест од 5.000 денари. Како и сите други, отидов да се пријавам во Заводот за детска заштита, но таму ми рекоа дека се уште немаат добиено пари за таа намена и дека можам да земам само стандардна еднократна помош, која следува за секое родено дете - вели Горан од Велес, кој пред еден месец стана татко на трето дете.
Ситуацијата е слична во сите општини што се опфатени со владината мерка. До редакцијата на „Време“ пристигнаа десетици поплаки од родители, кои и покрај тоа што ги исполнуваат условите, не можат да го остварат правото на парична помош, која Владата ја најавуваше со месеци. Жаклина Величковска, портпаролка во Министерството за труд и социјална политика, вели дека има голем интерес за остварување на ова право, но се уште не може да се утврди точниот број бидејќи процедурата за нивна обработка е во тек. Според неа, родителите што ги исполнуваат законските норми ќе ги добијат средствата што се предвидени. - Имајќи предвид дека ова се нови права, кои можат да се остваруваат за деца родени од 1јануари 2009 година, рано е да ги имаме податоците затоа што се уште се обработуваат. Моментно пријавите се во секторот за буџет и сметководство. Родителите што имаат поднесено барања и ги исполнуваат условите парите ќе ги добијат во втората половина од следната недела. Затоа ги замолуваме за стрпливост - вели Величковска. Според законските одредби, право на паричен надомест имаат мајките што се државјанки на Македонија, кои најмалку три години живеат во средини во кои природниот прираст е под 2,1 промил. Со мерките на Владата за секое второ дете мајката треба да добива пари во висина од 30 проценти од просечната плата во период од девет месеци. Родителскиот додаток за трето дете изнесува 50 проценти од просечната плата наредните десет години, а помошта за четврто или за повеќе деца изнесува 70 проценти -15 години.