Меморандум на македонска бизнис заедницa

Интензивирање на соработката меѓу Владата и Бизнис заедницата со цел подобрување на економскиот развој, поттикнување на вработувањето и привлекување странски инвестиции е целта на Меморандумот на Македонската бизнис заедница што денеска го презентира Европската бизнис асоцијација (ЕБА).

Зад документот, кој е своевидна порака до идната Влада, стојат девет бизнис асоцијации, Стопанската комора на Македонија, Стопанската комора на Северозападна Македонија, Американската комора, Македонско-германската асоцијација, Македонско-руската стопанска комора, Словенечко-македонскиот бизнис клуб, Европската бизнис асоцијација, Асоцијацијата на странски инвеститори и Британската бизнис група.

- Добрата соработка на Владата со деловната заедница е важен столб за зголемување на економскиот раст и за подобрување на животниот стандард. Се надевам дека Меморандумот ќе биде прв чекор кон постојан дијалог со политичките институции, рече Гинтер Офнер, претседател на Европската бизнис асоцијација, на прес-конференцијата пред официјалното презентирање на Меморандумот.

Офнер нагласи дека сугестиите и предлозите содржани во документот се понуда до Владата да го искористи искуството на домашните и меѓународните компании.

Според Николај Бејкерс од Македонско-германската бизнис асоцијација, Македонија постигна прогрес во однос на законската безбедност и стабилност, транспарентноста на јавните тендерски постапки и борбата против криминалот и корупцијата, но, како што рече, се уште има простор за натамошно подобрување во овие сфери. Околу 70 отсто од германските компании во Македонија ја оценуваат деловната клима како добра, а зголемен е и интересот за инвестирање, покажува последното истражување што го направи Македонско-германската асоцијација.

Поефикасно искористување на субвенциите и програмите од Европската унија, подобрување на процедурите за тендерските постапки за поголема ефикасност и транспарентност, минимизирање на регулативите и бирократските пречки, зајакнување на финансискиот пазар, како и развивање на круцијалната економска инфраструктура се само дел од препораките од Меморандумот на Македонската бизнис заедница.

На собирот  што го организира Стопанската комора на Македонија се разговара за искуствата на земјите-членки на ЕУ од ЈИЕ, државите-кандидати и аспиранти за членство, за нивните аспирации, подготвеноста за реформи, проблемите со кои се соочуваат во тие процеси, градењето консензус за реформите и мобилизирањето што поголем број економски субјекти што ќе ги поддржат.

Заменик-претседателот на Владата на Република Македонија Зоран Ставрески најави дека од почетокот на идната година, со цел спречување на повторно создавање на регулаторен товар, ќе стартува системот за заштита од „бирократизација“ на новите регулативи, во европските земји попознат како „Regulatory Impact Assessment“ - РИА.

- РИА има за цел постигнување поголема предвидливот на регулативата, активни консултации во сите фази на подготовка на законите и проценка на ефектите и трошоците од новата регулатива врз деловното окружување и граѓаните. Од јануари 2009 сите засегнати страни ќе можат да дадат свој придонес во креирањето на законите на транспарентен и ефикасен начин, нагласи Ставрески.
 
Претседателот на Стопанската комора на Македонија Бранко Азески ја нагласи важноста на, како што рече, „долгоочекувана изјава на заменик-премиерот, дека од 1 јануари идната година бизнис-заедницата ќе биде редовно консултитрана за сите законски проекти од економската сфера, што ќе го забрза вклучувањето на Македонија во европските интеграции каде тоа е редовна пракса веќе десетина години“.

Професорот Борис Цизељ, директор на словенечката Асоцијација за бизнис и истражување, која се занимава со лобирање во Брисел, во рамките на Форумот го претстави начинот на кој таа лоби-група може да им помогне на македонските  стопански субјекти да дојдат до повеќе средства од ЕУ.

- На овој значаен собир претставив како конкретно тоа би функционирало. Во Брисел постојат повеќе од три илјади организации што се занимаваат со лобирање, а голем број веќе постојат и за регионот на Западен Балкан. Не е дека без лобисти не може да се дојде до европските средства, но со лобирање тоа е мошне полесно. Македонија има квота од повеќе од 200 милиони евра преку ИПА-програмата, но ние можеме многу да помогнеме во делот на учеството на македонските фирми преку т.н. комунитарни програми, за кои заинтересираните компании мораат да се обраќат директно во Брисел, додека средствата од ИПА-програмата се реализираат преку владини проекти, истакна Цизељ, поранешен шеф на словенечката дипломатија и амбасадор на Словенија во Брисел.