Во Јуни 2006 година во САД беше одобрена првата вакцина против ХПВ. Вакцината е позната под називот Gardasil вакцина. Во клиничките испитувања, вакцината се покажа како многу ефикасна во спречување на инфекција со два типа ХПВ вируси од групата со висок ризик, ХПВ 16 и ХПВ 18. Овие вируси се одговорни за 70% од случаите рак на грлото на матката предизвикани од ХПВ. Вакцината исто така заштитува и од инфекција со ХПВ тип 6 и 11, кои предизвикуваат приближно 90% од гениталните брадавици.
ХПВ вакцината е рекомбинантна вакцина, што значи дека во себе не содржи живи вируси. Вирусот во вакцината е протеин добиен со генетски инжењеринг и не може да предизвика ХПВ инфекција. Се дава во серија од три инјекции во мускул во тек на шест месечен период.
Во САД вакцината рутински им се дава на девојчињата на возраст помеѓу 11 и 12 години. Сепак, вакцината може да им се даде и на девојчиња на 9 годишна возраст во соработка со матичниот гинеколог.
Најдобро е ХПВ вакцината да се дава пред девојката да стане сексуално активна. Иако жените кои не биле претходно изложени на ХПВ имаат потполна корист од вакцината, се покажало дека од вакцината имаат корист и жените кои веќе претходно биле сексуално активни и притоа биле изложени на ХПВ. Од тие причини се препорачува жените на возраст меѓу 13 и 26 години исто така да се вакцинираат.
Жените кои примиле вакцина треба да продолжат да се придржуваат кон редовните гинеколошки прегледи и ПАПА тестови. Вакцината не заштитува од останатите полово преносливи болести па жените мораат да се придржуваат кон вообичаените мерки за заштита од овие болести.

Како може да се намали ризикот од инфекција со ХПВ?

За оние лица кои се сексуално активни, спречувањето на инфекцијата може да биде тешко бидејќи повеќето од нив воопшто не знаат дали се инфицирани. Сепак постојат бројни начини како да се намали ризикот од инфекција, а меѓу нив спаѓаат:
 

• Да се практикува моногамија (да се има еден единствен сексуален партнер).  Долготрајната врска со неинфициран партнер може да ја спречи инфекцијата. Сепак вирусот е току чест што имањето сексуални односи само со еден партнер во животот не е гаранција дека сигурно нема да се инфицирате со ХПВ.
• Користење кондом. Латекс кондомите можат да обезбедат заштита доколку истиот го покрива делот од слузокожата кој што е инфициран од ХПВ.
• Одбегнување сексуален однос со лице кое има генитални брадавици. Лице со јасно видливи генитални брадавици треба да се воздржува од сексуални односи се додека не се отстранат брадавиците. Оваа го намалува ризикот од ширење на ХПВ.
• Редовно ПАПА тестирање. Иако тестовите не штитат од инфекција, сепак тие рано ги откриваат променита на грлото на матката што е особено важно во спречувањето на појава на рак на грлото на матката.