МАКЕДОНСКА БЕРЗА

Единствен од ова друштво на најмоќни македонски директори кој заработил во текот на изминатава “црна” берзанска година, е кратовскиот бизнисмен Љубисав Иванов-Ѕинго. Неверојатно, но Иванов, кој има мнозински акционерски удел од 54,3% во Рударскиот комбинат Силекс од Кратово, оваа година заработил 31,9 илјади евра. Или Ѕинго, за една година ја зголемил вредноста на сопственичкиот удел во Силекс за 13%. Причината за ова, се разбира е помалиот интерес за тргување со акциите на Силекс, а и малиот пораст на цената на акцијата на ова друштво, која лани изнесувала 63 денари, а деновиве чини 71 денар.

По околу 10 милиони евра загубија и Штерјо Наков и Живко Мукаетов
Како резултат на финансиската криза и берзанската депресија најмногу настрадаа акционерите и директорите на друштвата, чии акции лани летото достигнаа историско највисоки вредности. Така, ако лани една акција на Фершпед чинеше 300.000 денари, а во некои моменти достигна и 400.000 илјади денари, деновиве чини близу 129.000 денари, што претставува над 40% намалување на цената на оваа акција.

Па така втор на листата според големината на загубата на својот акционерски удел, мерено во апсолутен износ, е бизнисменот Штерјо Наков, кому изминатава година мечкиниот пазар на Македонска берза му однесе 11,8 милиони евра. Или пазарната капитализација на 23,4% удел што Наков го има во Фершпед, од 26 септември лани до 26 септември годинава се намалила за 57%.
Трет на листата е директорот на најголемата домашна фармацевтска компанија Живко Мукаетов. Мукаетов загубил 10,5 милиони евра од вредноста на неговите акции во Алкалоид. Според извештаите на Централниот депозитар за хартии од вредност, Живко Мукаетов во Алкалоид поседува акционерски удел од 6,3%. Според тоа, вредноста на неговиот удел, се намалила за 54%.
Коста Младеновски, директорот на шпедиторското друштво Макошпед, кој има 24,8% акции во шпедитерската компанија, загубил 65% од вредноста на својот удел. Или, неговата загуба вредносно, мерена од ланскиот 26 септември до 26 септември оваа година изнесува 4,8 милиони евра.
Петти според висината на намалениот капитал на Македонската берза е директорот на Тетекс од Тетово, Глигорие Гоговски. Тој има загубено високи 76% од вредноста на неговиот акционерски удел. Во апсолутна бројка, намалувањето на пазарната капитализација на неговите акции во Тетекс е речиси четири милиони евра.
По него, или шести на листата е прилепскиот бизнисмен Симон Наумоски, директор на Витаминка од Прилеп. По ланското “плодно” лето на Македонската берза, а потоа и стрмоглавиот октомвриски пад на индексот МБИ 10, изминатава година на Наумоски му пропаднале 3,2 милиони евра. Односно, вредноста на неговите 24% акции во Витаминка паднала за 56%.
Директорот на Жито Вардар од Велес, Ристе Ташев изгубил високи 64% од вредноста на своите акции во друштвото. Или во апсолутни бројки, неговиот капитал на Македонската берза се намалил за 1,6 милиони евра.
На осмото место според загубата во апсолутни бројки, но на прво место според процентуалниот пад на вредноста на акционерскиот капитал, мерено во дадениот временски период, е бизнисменот Минчо Јорданов. Тој поседува 21% во друштвото РЖ Интер Траншпед и во оваа рецесиска берзанска година загубил дури 78% од вредноста на уделот. Во апсолутни бројки, намалувањето на вредноста на уделот на Јорданов, во РЖ Интер Траншпед изнесува 709 илјади евра.
Членот на групацијата менаџери М6, бизнисменот Светозар Јаневски, според Централниот депозитар за хартии од вредност, поседува 20,4% удел во АутоМакедонија. Во оваа “црна” година за Македонската берза, Јаневски загубил само 25% од вредноста на својот сопственички удел, или во пари тоа изнесува 328,5 илјади евра.
Се разбира, во ова рангирање на Капитал не се пресметани акционерските удели на споменатите бизнисмени, кои поради раситнетост, не се видливи во листите на ЦДХВ со акционери кои поседуваат над 5% акции.
Ако се земе предвид големината на македонскиот пазар на капитал, загубите што ги погодија македонските директори се навистина огромни. Сепак, оние директори кои најмногу загубија, според достапните податоци, останаа и најбогатите директори. Милковски во Гранит, Мукаетов во Алкалоид и Наков во Фершпед, сe уште имаат највредни акционерски удели од сите разгледувани директори. Секој од овие директори има удели во компаниите кои ги управуваат кои вредат по околу девет милиони евра.