Импичмент за Црвенковски!!

Претседателот Бранко Црвенковски заслужува импичмент бидејќи се меша во партиски работи е коментарот што деновиве се вртеше меѓу приврзаници на досегашниот лидер на СДСМ, Владо Бучковски. Наводно во неговата струја се размислувало во Собранието да се побара одговорност од шефот на државата поради преписката со Бучковски, на ден пред конвенцијата.

 

- Ако се има предвид тоа што се случуваше пред конвенцијата, прашањето за импичмент не е исклучено. Кога можеа амбасадорите Ѓорѓи Спасов и Љупчо Јорадновски да бидат повикани на одговорност поради тоа што напишале колумни за СДСМ, зошто шефот на државата да не одговара за мешање во внатрепартиски работи - изјави член на СДСМ, кој на конвенцијата застана на страната на Бучковски.

 

Сепак, тој истакна дека досега не се разговарало на таа тема во неговата „фракција“ и наведува дека на Македонија и претстојат многу важни работи на надворешен план, како што се самитот на НАТО во Рига, очекувањето на преговорите за членство во ЕУ и решавањето на статусот на Косово. Поради тоа се наметнува дилема дали е во ред да се отвора прашањето за импичмент на шефот на државата, кој има надлежности во надворешната и во безбедносната политика.

 

Доколку бучковистите навистина решат да ја испитаат одговорноста на Црвенковски, ќе треба да обезбедат двотретинско мнозинство во Собранието. Бучковски има десетина поддржувачи во пратеничката група. Од владејачките ВМРО-ДПМНЕ, НСДП и ДПА, пак, велат, дека првпат слушаат за таква иницијатива. Во ВМРО-ДПМНЕ единствено велат дека имало одредено незадоволство од соопштението на Црвенковски за случајот „Мајкрософт“, во кое тој оцени дека зад нападите врз Радмила Шеќеринска стојат нарачатели од ВМРО-ДПМНЕ и од СДСМ.

 

Во прашање е комплицирана постапка, која се поведува во случај кога има показатели дека шефот на државата ги крши Уставот и законите при извршувањето на своите должности. Постапката за испитување одговорност ја поведува Собранието, со поддршка од најмалку 80 пратеници. За одговорноста, пак, одлучува Уставниот суд, со двотретинско мнозинство од вкупниот број судии.

 

Ако уставните судии утврдат одговорност на претседателот, функцијата му престанува по сила на Уставот.

 

Шпекулациите за импичментот се надоврзаа на се погласните муабети дека се планираат уставни измени, со кои во иднина шефот на државата би се избирал во парламентот наместо на непосредни избори. Таква евентуална одлука би значела намалување на овластувањата и на легитимитетот на идниот претседател.