Рецепти за торти и други благи работи

БАКЛАВА со гриз

Потребно е: 1кг готови кори, 700г ореви (половина мелени, половина толчени), 500г путер, 2 лажици гриз, 2 лажици ладна вода.
Во плех се редат три кори па се прскаат со путер кој е претходно растопен на тивок оган. Се посипуваат со оревите мешани со гризот. Се редат корите една по една, па секоја се прска прво со путер, а после со ореви. Се завршува со три кори кои пак се прскаат со путер. Откако ќе се исече (баклавата секогаш се сече непечена), се прска со останатиот путер во кој се додадени двете лажици ладна вода. После печењето се попарува со шербет од 1300г шеќер и 700мл вода, и тоа топла баклава со топол шербет (многу убаво омекнува, само одозгора е крцкава).

РОЛАТ БАКЛАВА

Потребно е 1 кг готови кори. Филот се прави од 150г мелени ореви, 150г сецкани ореви, 100г суво грозје, 100г кокос, 100г рендано чоколадо за готвење и една и пол шолја шеќер - сите овие состојки се попаруваат со една шолја врела вода и убаво се меша.
За секој ролат се редат по 4 кори, се прскаат со масло и вода, па се филуваат и се виткаат. После печењето се попарува со шербет од 1кг шеќер и 1л вода.

БАКЛАВА СО ЛЕШНИЦИ

Потребно е 1кг готови кори, 500г лешници, еден маргарин, 250г масло. Се редат корите во плех и секоја се прска со малку масло и малку потпечени мелени лешници. Кога е готова се сече, па се попарува со стопениот маргарин, па се пече. Шербетот се прави од еден и пол кг шеќер, литар вода, ќесичка ванилин шеќер и малку лимонтос, па ладната баклава се попарува со топол шербет.

ГРЧКА БАКЛАВА

Потребно е 500г кори, 300г мелени ореви, 300г кокос, две чоколади за готвење и ќесичка цимет.
За прскање на корите се топи еден маргарин и се меша со една чаша (средна големина) масло.
Секоја кора се прави посебно. Се прска прво со мешавината од масло и маргарин, па се прска од филот направен од оревите, кокосот, ренданите чоколади за готвење и циметот. Се зема игла за плетење, на неа се витка кората како ролат, се набира од двете страни и се вади од иглата. Се сече на три дела (ова се оние мали баклавчиња, за едно залаче). Се пече на 200 степени, а ладна се попарува со млак шербет од 1кг шеќер и 700мл вода.

Печени јаболка

Печените јаболка ја подобруваат работата на бубрезите. За да ги подготвите, потребно ви е: 8 јаболка, 8 лажички шеќер, 1 лажичка мелен цимет, 8 лажички џем од вишни, 50 г путер и 50 г бадеми исечени на ливчиња.
Приготвување: јаболката измијте ги и издлабете им ја средината. Во секое јаболко ставете малку џем од вишни, па посипете ги со шеќер и цимет. Јаболката наредете ги во тавче, прелијте ги со стопениот путер, посипете ги со ливчињата од бадемите и печете ги 20 минути во рерна загреана на 175 степени.

Шербет

Кошнички со мусли

Потребно:

* 200 г шеќер
* 6 лажици сок од портокали
* масло
* 100 г суви кајсии
* 50 г бадеми, исечени на ливчиња
* 50 г овесни снегулки

Приготвување: овесните снегулки и ливчињата од бадем малку пропржете ги во тефлонско тавче, без да додадете масло. Откако ќе се изладат излешајте ги со ситно сечканите кајсии. Карамелизирајте го шеќерот на тивок оган, додадете го сокот од портокалот и мешајте додека смесата не се претвори во сируп. Додадете ја смесата од снегулките, добро измешајте и тенџерето извадете го од рингла. Со помош на две лажички направете топчиња и распоредете ги врз алуминиумска фолија премачкана со масло. Откако ќе се стврднат, колачињата ставете ги во хартиени кошнички.

Чоколадни снегулки

Потребно:

* 100 г темно чоколадо
* 20 г маргарин
* 50 г пченкарни снегулки
* 1 лажица мед

Приготвување: маргаринот загрејте го и во него стопете го чоколадото кое претходно сте го искршиле на помали парчиња. Откако чоколадото ќе се стопи, додадете ги пченкарните снегулки и медот. Сето тоа добро измешајте го. Со помош на две лажички од смесата правете топчиња и редете ги врз хартија за печење. Така подготвените чоколадни снегулки ставете ги во фрижидер и чувајте ги таму до употреба.

Колач од цимет

Потребно:

* 150 г мелени ореви
* 150 г мелени бадеми
* 300 г шеќер
* 40 г цимет
* 2 кесички прашок за печиво
* 2 кесички ванилин шеќер
* 300 г брашно
* 300 г путер
* 200 г смрзнато овошје
* 2 јајца

Приготвување: сите состојки, освен смрзнатото овошје, добро измешајте ги, па смесата поделете ја на два дела. Половина од смесата расучете ја во кора колку што е тавчето, па печете ја 5 минути во рерна загреана на 180 степени. Потоа, смрзнатото овошје распоредете го врз потпечената кора, прекријте ги со втората половина од смесаата, расучена во кора, па колачот печете го додека не зарумени.