Повеќе од 24 часа Израел бомбардира цели во Либан

Повеќе од 24 часа израелски авиони бомбардираат цели во Либан, во најсилната операција на израелската војска долж границата со Либан во последните 10 години.

Повеќе од 40 луѓе, меѓу кои и едно 11-члено семејство, загинаа во бомбардирањата на позициите на радикалното шиитско движење Хезболах.

Израелски авиони рано изутринава испукаа повеќе ракети врз главната писта на меѓународниот аеродром во Бејрут, по што тој беше затворен.

Израелската армија ја предупреди либанската Влада да го евакуира цивилното население од јужниот дел од Бејрут, каде се наоѓа седиштето на лидерот на Хезболах шеик Хасан Насрала.

Офанзивата на израелската армија уследи откако герилците на Хезболах убија осум и заробија двајца израелски војници.

Израелскиот министер за одбрана Амир Перец изјави дека на герилците на Хезболах нема да им биде дозволено да се вратат на упориштата долж границата со Израел.

Военото крило на Хезболах, Исламистички отпор, објави дека со проектил со голем дострел ја погодиле израелската воздухопловна база на планината Мајрун.

Војна, објавуваат на првите страници израелските весници, а државната телевизија јави дека во наредните неколку часа е можна голема копнена операција на израелската војска, прикажувајќи снимки на оклопни единици кои се движат кон Либан.

Ова се најжестоките судири меѓу Израел и Хезболах и либанските сили за безбедност од друга страна, откако пред шест години израелската армија се повлече од тампон зоната по 18-годишна окупација.

Премиерот Олмерт по синоќешната вонредна седница на Владата побара од Советот за безбедност на ОН да го осуди киднапирањето на израелските војници од страна на Хезболах и усвојување на резолуција со која од либанската Влада ќе се бара разоружување на милитантите и преземање на целосна контрола на границата.

Претставници на т.н. Блискоисточен квартет САД, ЕУ, ОН и Русија водат интензивни консултации за решавање на израелско-либанскиот конфликт.

Американскиот претседател Џорџ Буш изјави дека Израел има право да се брани, но од друга страна, официјален Париз го осуди израелското рекетирање на Либан, нагласувајќи дека се работи за непропорционален воен одговор.