Tенис

ТЕНИС - ШВАЈЦАРЕЦОТ ЌЕ ИМА ТЕШКА ЗАДАЧА ДА НАПРАВИ ХЕТ-ТРИК ВО ШАНГАЈ

Симон го суреди Федерер, Мареј почна силно

Рожер Федерер ќе има тешка задача ако сака да стигне до третата титула едноподруго на Тенис Мастерс Купот. Првиот носител беше шокиран во првиот натпревар од Црвената група на 4.45 милиони $ вредниот турнир во Шангај и тоа од Французинот Жил Симон со 4:6/6:4/6:3.

Осмиот носител Симон беше последниот тенисер кој беше повикан на турнирот откако Рафаел Надал се повлече од хардкорт турнирот. Иако поразот во понеделникот не го елиминираше Федерер од турнирот, работата за него стана многу потешка. Во следните две кола се уште го чекаат поранешниот светски број 1, Американецот Енди Родик и финалистот од УС Опен, Британецот Енди Мареј, двајца други тенисери кои го поразија барем еднаш во 2008.

Имаше сомнежи дека Швајцарецот не е доволно физички подготвен поради проблемите со повредата на грбот поради која се повлече од Мастерсот во Париз пред две недели, но 27-годишниот "Маестро" покажа малку знаци на проблеми и почна супериорно.

"Денеска промашував удари кои обично не ги промашувам. Мислам дека се работеше само за недостаток на тренинг и несигурност поради грбот. Се обидував да не туркам до крај и среќен сум што барем грбот не ми прави проблеми.  Одиграв три сета и ќе можам да бидам подобар во следните мечеви", вели Федерер.

Симон успеа да спаси три брејк топки во третиот гем, но Федерер поведе два гема подоцна за да го освои првиот сет за само 41 минута. Светскиот рекет број 9 Симон го совлада Федерер во нивниот предходен меѓусебен дуел на Мастерсот во Канада оваа година, но 24-годишниот Французин имаше проблеми во вториот сет кога Федерер направи уште еден брејк поен.

Но, Симон почна да игра далеку подобро и врати со брејк поен во вториот сет и откако спаси три брејк топки во шестиот гем во третиот сет, поведе со 5:3.

"Секогаш е тешко да се победи против Федерер. Знам дека морам да го играм мојот најдобар тенис за да победам. Го совладав еднаш во Торонто и затоа не бев нервозен", вели Симон.

Во вториот дуел од Црвената група во понеделникот, Британецот Енди Мареј со 6:4/1:6/6:1 го совлада Американецот Енди Родик. Мареј го освои лесно првиот сет без да има проблем со брејк поени, но му дозволи на Родик да се врати во вториот сет.

"Беше малку тешко. Мислев дека првиот и вториот сет беа слични, бидејќи двајцата не грешевме многу. Но, на почетокот на третиот сет се се смени", вели Родик.

Мареј се врати бргу во третиот сет, правејќи брејк за 2:0 водство. Откако остана сигурен на свој сервис, Шкотланѓанецот повторно направи брејк за 4:0 водство и потоа лесно го заврши мечот.

"Удирав доста добро во поголемиот дел од мечот, но во вториот сервисот ме предаде. Имав шанси да му направам брејк на почетокот на вториот сет, и ако го направев тоа ќе беше поинаква приказна", вели Мареј.

Со два тенисери кои влегуваат во полуфиналето, Родик ќе мора да стигне до втора победа во кариерата над Федерер за да ги оддржи шансите да се пласира понатаму. Во Златната група се Новак Ѓоковиќ, Николај Давиденко, Хуан Мартин Дел Потро и Жо-Вилфрид Цонга.

Првата награда на турнирот е 625.000$, а ако шампионот биде непоразен на турнирот ќе добие вкупно 1.34 милиони $.

РЕЗУЛТАТИ

ТЕНИС МАСТЕРС КУП - ШАНГАЈ, 4.450.000$

СИНГЛ

(8) Симон - (1) Федерер       4:6/6:4/6:3

(3) Мареј - (5) Родик            6:4/1:6/6:1

ДВОЈКИ

(2) Нестор/Зимоњиќ - (7) Фирстенберг/Матковски         7:6(7:4)/5:7/10:4

(4) Бјоркман/Алјет - (6) Длоухи/Паес        6:3/7:5

КОНЕЧНА ВТА ЛИСТА ЗА 2008

1.(-) Јелена Јанковиќ (Срб) 4.710

2.(+1) Серена Вилијамс (САД)       3.866

3.(-1) Динара Сафина (Рус) 3.817

4.(+1) Елена Дементиева (Рус)       3.663

5.(-1) Ана Ивановиќ (Срб)  3.457

6.(+2) Венус Вилијамс (САД)        3.272

7.(+2) Вера Звонарева (Рус)            2.952

8.(-1) Светлана Кузнецова (Рус)     2.726

9.(-3) Марија Шарапова (Рус)         2.515

10.(-) Агниешка Радванска (Пол)   2.286

11.(-) Надја Петрова (Рус)   1.976

12.(+1) Каролине Возниацки (Дан)           1.678

13.(+1) Флавија Пенета (Ита)         1.670

14.(+1) Пати Шнидер (Шва)           1.590

15.(+2) Викторија Азаренка (Блр)  1.494

16.(+2) Ализе Корне (Фра) 1.492

17.(-1) Марион Бартоли (Фра)        1.410

18.(-6) Ана Чакветадзе (Рус)           1.363

19.(+1) Доминика Цибулкова (Свк)          1.337

20.(+1) Катарина Среботник (Сло)            1.272

Надал нема да игра во Дејвис Куп финалето

Светскиот рекет број 1, Рафаел Надал ќе го пропушти финалето од Дејвис Купот во кое неговата Шпанија гостува на Аргентина откако не успеа да се оправи од повредата (тендинитис) во коленото. Надал вели дека ова била многу тешка одлука и дека направил се што може да се опорави на време.

"Навикнат сум да играм со болка, но ова беше сосема нова и поинаква болка која не можам да ја контролирам", се вели на неговиот личен веб-сајт.

Повредата го примора Надал да се повлече од Мастерс Купот во Шангај кој започна во неделата откако се повлече од 1/4 финалето против Николај Давиденко на Мастерс турнирот во Париз. Шпанската Тениска Федерација ќе го објави составот за дуелот во Мар Дел Плата од 21 до 23 ноември денес.

Шампионот од Ролан Гарос и Вимблдон предходно за повредите го обвинуваше пренатрупаниот тениски календар, а за повлекувањето доби поддршка и од ривалите кои играат во Шангај.

"Рафа го заслужи секое право да избере кои се неговите приоритети. Тој е одговорен за себе, за своите тимски колеги од Дејвис Куп тимот и за Шпанија", вели Енди Родик.

Рожер Федерер вели дека на фановите ќе им недостасува светскиот број 1, но дека тој не е разочаран. "Не сме во врска", се пошегува Швајцарецот кога беше запрашан дали му е жал што Надал не е на турнирот.

ВТА се согласи на отстапки кон тенисерките

Женската Тениска Асоцијација (ВТА) се согласи да врати слободни први кола на одредени турнири во 2009 во обид да се смират стравувањата за напорниот календар. Врвните тенисерки беа загрижени дека ако играат два силни турнири во две недели, без слободни први кола нема да имаат можност за одмор.

"Имаше неколку тенисерки кои беа загрижени за оваа тема. Прво беа загрижени за тоа што нема доволно пауза помеѓу некои од големите турнири, посебно на турнирот во Рим и Мадрид следната година. На есен исто така има два такви турнири, Токио и Пекинг. Едноставно решение е тие кои ќе стигнат до полуфиналето да имаат слободно прво коло на следните турнири. Втората грижа беше дека некои тенисерки нема да можат да играат на дел од Премиер 700 турнирите. Направивме промени на турнирите во Париз, Чарлстон, Штутгарт, Стенфорд и Лос Анџелес и сега било која тенисерка ќе може да игра на два од нив", вели шефот на ВТА, Лери Скот.

Победничката на ВТА Шампионатот, Венус Вилијамс вели дека разговорите со ВТА биле позитивни.

"Работевме заедно последнава недела и мислам дека сите се задоволни. Најважно е да се разговара", вели Американката.