Чоколадна панакота торта (без печење, без миксер)

Состојки
За подлога
200 гр пишкоти
За бел крем
300 мл слатка павлака
100 гр бело чоколадо
1 лажичка ванила екстракт
3 полни лажици кисела павлака
10 гр желатин
За кафеав крем
300 мл слатка павлака
100 гр црно чоколадо
3 полни лажици кисела павлака
1 лажичка ванила екстракт
10 гр желатин
За украсување
150 мл слатка павлака
чоколадни топчиња

Лесна, летна, прецизна, чоколадна, торта која не се пече, а за нејзина подготовка не ви треба ниту миксер. Како сме во летниве горештини, а имаме и едно летно дете, односно роденден на средниот син Виктор, тортава беше вистинско роденденско уживање. Уживајте и вие во чоколаднава панакота!

Подготовка
1. Пишкотите ги редиме во тавче со обрач кое сме го премачкале со малку путер колку да се залепат пишкотите. На обрачот местиме најлонска фолија или хартија за печење.
2. Желатинот го прелеваме со 20-30 мл вода и го оставаме да набабри. За белиот крем ја ставаме слатката павлака заедно со белото чоколадо и ванила екстрактот да се топлат на оган ( да не се случи да врие). Кога ќе се растопи чоколадото, и со постојано мешање се изедначи кремот го тргаме на страна и го ставаме желатинот. Со рачната маталка матиме до соединување. На крајот ја додаваме киселата павлака, соединуваме, малку го ладиме кремот (кој е во течна состојба слична на јогурт), сосема кратко и го истураме врз пишкотите, во калапот за торта бр. 22.
3. Го ставаме во фрижидер најмалку 1 час, а може ако сакате побрзо да биде да ја ставите и во замрзнувач.
4. Потоа го правите кафеавиот фил на идентичен начин, па и него го ставате врз белиот крем кој веќе ни е стегнат. Ја оставате во фрижидер за да се стегне неколку часа. Го вадите обрачот и ја отстранувате најлонската фолија.
5. Потоа ја украсувате по желба. Јас изматив слатка павлака и ја премачкав тортата па наредив чоколадни топчиња и чоколадни плочки на неа.

Забелешка
Најдобро е да се прави навечер, за утредента да ви биде подготвена и да ви остане само украсувањето.
Се ставаат по три полни лажици слатка павлака или околу 180-200 гр ако мерите со вага.
Додека го ставате белиот крем во калапот кој е во течна состојба може да ви се случи „раздвижување на пишкотите“, само нежно притиснете ги тие ќе се залепат за тавчето и веднаш во фрижидер.
За да ви биде побрзо ладењето на белиот крем ставете го калапот во замрзнувач.
Ако ја правите во тавче бр. 26 потребно е дупло да ги зголемите состојките.

Состојки
50 гр шеќер
3 лажички инстант кафе
250 гр млеко
250 гр млечна слатка павлака
1 кесичка желатин
3 лажици ладна вода

Желатинот ставете го во еден мал сад и прелијте го со водата. Оставете го 10 минути да набабри.
Во меѓувреме ставете ги во тенџерче млекото, слатката павлака и шеќерот да се стоплат, но не да вријат. Тргнете ги од огнот па додадете го кафето и промешајте да се растопи. На крај ставете го и набабрениот желатин и пак промешајте.
Смесата поделете ја во чаши или модли и оставете да се олади на собна температура. Потоа преместете ги во фрижидер да се стегнат.
Пред сервирање поминете со тенко ноже по рабовите на панакотата за да ја разделите од чашата и превртете ја на чинија.

Пријатен апетит!

Количеството на кафе може да го зголемите или намалите по желба на консументите. Нам вака најмногу ни одговара.

Состојки
200мл млеко
200мл слатка павлака
50гр шеќер
1 пакетче ванилин шеќер
1 пакетче желатин
500гр јагоди
150гр шеќер
1 пакетче желатин

Во сад на страна ставете го желатинот и потопете го со 5 лажици вода и оставете го да набори.
Млекото, слатката павлака, шеќерот и ванилиниот шеќер ставите ги на оган само колку да се затопли смесата, потоа тргните го тенгерето и во него ставете го набобрениот желатин.
Смесата истурeте ја во чаши, а нив ставете ги во фрижидер да остојат 2 часа. Откако ќе поминат тие 2 часа и белиот дел ќе биди убаво стегнат се приготвува делот од јагоди.
Повторно желатинот пригответе го на истиот начин.
Јагодите изблендиратеј ги и заедно со шеќерот ставете ги на оган колку да се затопли смесата и на крај додајте го набобрениот желатин. Ова смеса се истура врз белата смеса и повторно се остава во фрижидер уште 2 часа.

Состојки
500мл слатка павлака
70-100 гр шеќер
1 ванила- стапче ванила
1 кесе желатин
3 лажици ладна вода или 45 мл
2 лажици афион
100мл сок од вишни за растворање
4-6 кандирани вишни

Во сад ја налеваме слатката павлака.
Го додаваме стапчето ванила, расечената мешунка.
Или може да се стави ванила шеќер.
Го додаваме и кристал шеќерот.
Оставаме така да одстои 30 минути.
Сега го ставаме желатинот во садче со ладна вода, за да набабри.
Потоа ја вадиме мешунката ванила и ја загреваме слатката павлака до вирење.
Тргаме на страна
Го додаваме набабрениот желатин.
промешуваме, за да се растопи желатинот во топлата смеса.
Го додаваме и немелениот афион.
Промешуваме.
Мали модли или модли по желба куглоф, правоаголна тава....тенко ја премачкуваме со масло.
Ја истураме подготвената смеса.
Оставаме во фрижидер од 2-3 часа.
Потоа ја превртуваме панакотата од садовите, ја декорираме со сируп од вишни, кандирани вишни...и послужуваме.

Панакота чокоминт ролат (after eight panna cotta)

Состојки
За дел со црно чоколадо
150 мл слатка павлака
2 лажици полни кисела павлака
50 гр црно чоколадо
2 лажици ликер од чоколадо
5 гр желатин
За дел со бело чоколадо
150 мл слатка павлака
2 лажици полни кисела павлака
50 гр бело чоколадо
5 гр желатин
на врв на лажичка зелена боја
1-2 лажички ментол екстракт
За подлога
6-8 пишкоти
За фил
100 мл слатка павлака
50 гр бело чоколадо

Подготовка
Желатинот (10 гр) го прелеваме со вода (околу 50 мл) и го оставаме да набабри. Потоа набабрениот желатин го делиме на два дела, еден за кафеавиот, а еден дел за бело- зелениот дел.
1. За првиот дел ја ставаме слатката павлака заедно со чоколадото да се загрее до вриење (да не врие), а во исто време мешаме да се растопи чоколадото. Го тргаме на страна и го растопуваме желатинот во него. На крајот ја додаваме киселата павлака и ликерот од чоколадо, мешаме до изедначување на смесата. Оставаме на страна малку да се згусне и подизлади.
2. За вториот дел исто така, слатката павлака и белото чоколадо ги мешаме додека да се растопи чоколадото. Потоа го ставаме желатинот, го растопуваме со мешање и на крај ја додаваме киселата павлака. Мешаме до соединување. Откако малку ќе подизлади смесата ставаме боја која претходно сме ја растопиле во неколку капки вода и ставаме ментол екстракт. Со лажица само правиме две три размешувања, како би се направил мраморен изглед на смесата. Ова може да го направиме и кога ќе го ставиме белиот дел во калапот во кој ќе го правиме ролатот.
3. Силиконскиот калап го намрсуваме со путер и нежно лажица по лажица ја истураме зелено-белата смеса. Го ставаме во фрижидер да се стегне малку, па врз неа го истураме чоколадниот кафеав дел.
4. Најгоре ги редиме пишкотите, нежно и рамномерно, за да кога ќе го превртиме ни дојдат како подлога. Калапот го ставаме во фрижидер да се стегнат слоевите, најмалку 3 часа.
5. За фил ја матиме слатката павлака и го растопуваме чоколадото, па ги соединуваме со матење. Го ставаме филот во шприц и филуваме по вкус и желба. Наросуваме какао.

Забелешка
Отакако ќе се растопат чоколадните делови добро е да се подизладат и згуснат малку пред да ги ставиме во калап бидејќи се во течна состојба, за да добиеме слоевит ролат.

Снежна панакота торта (Frozen panna cota cake)

Состојки
1 правоаголна кора за торта винчини
1 ролат Џамбо Винчини
200 гр шеќер во прав
1 л слатка павлака
100 мл млеко
200 гр млечно бело чоколадо
15 гр желатин
ментол или ванила екстракт по вкус
сина течна прехрамбена боја

Едноставна и брза подготовка. Само знаете дека кога правиме пана кота потребно ни е време за да се стегне кремот, значи имаме чекање, а потоа се разбира уживање.

Подготовка
За оваа панакота торта ни се потребни правоаголните кори на винчини, од кои ќе искористиме само една кора.
1. Во квадратен калап со обрач ставаме кора која претходно сме ја исекле по димензиите на калапот.
2. Винчини ролатот го сечеме на кришки со дебелина од околу 1 см. Ги редиме по рабовите на калапот.
3. Желатинот го ставаме во околу 50 мл вода да се растопи.
4. Во 700 мл слатка павлака го ставаме млекото и шеќерот и ги загреваме до вриење.
5. Откако ќе почнат да вријат го тргаме тенџерето од рингла и ги ставаме чоколадото и желатинот да се растопат, со постојано мешање.
6. Ги додаваме екстрактот и бојата па повторно промешуваме. Оставаме да се лади.
7. Кога ќе почне да се стегнува панакота кремот, го истураме врз кората. Ја ставаме во ладилник убаво да се стегне. Јас обично ја правам навечер и ја оставам преку ноќ.
8. Утредента го матиме остатокот од слатката павлака, ја премачкуваме и ја наросуваме со син шеќер кристал и сини топчиња.

Забелешка
Ментол екстрактот дали воопшто ќе го ставите, неколку капки или цел екстракт, оставам на ваш избор и вкус.
Панакота кремот е течен, па треба да го причекате да се излади за да полека почне да се стегнува. Јас направив грешка, почнав да го ставам врз кората изладен, сепак уште течен, па како калапот не ми дихтуваше убаво, почна да истекува од страните, а и ролатите ми се обоија во сино(иако не е тоа толку страшно, колку што е моментот на истекување). Кога видов веднаш ја вратив во тенџере и ја почекав да почне да се стега, па потоа ја ставив врз кората. Ова е моето искуство...ако имате цврст калап кој не пропушта течност, ставајте ја и течна, боењето на ролатитет е баш интересно....
Кога ја обмислив тортата идеата беше да биде коцка мраз, ама бидејќи калапот кој го имам е баш голем, некако не ми успеа замислата со оваа доза на продукти за пана кота кремот....Како и да е тортата е вкусна и штосна.