Доколку отсекогаш ве интересирало како се прави прочуениот француски десерт ,,Макаронс’’, го пронајдовме оригиналниот рецепт за вас.

Состојки

• 250 гр шеќер во прав
• 100 гр шеќер
• 100 гр мелени бадеми
• 2 лажици какао
• 4 белки

Крем

• 200 гр чоколадо за готвење
• 100 мл павлака за готвење

Начин на подготовка

Оставете ги белките да отстојат на собна температура. Изматете ги со миксер, а потоа додавајте постепено од шеќерот, малку по малку додека смесата не се зацврсти.

Замешајте ги мелените бадеми и шеќерот во прав во смесата. Додадете го и какаото, па внимателно измешајте. Сипете ја смесата на хартија за печење со помош на готварски шприц или кесички за замрзнувач.

Оставете ги 1 час да се сушат. Печете ги 15 минути во рерна на 150 степени. Растопете го чоколадото во павлаката и оставете да се олади. Наполнете ги кексите и чувајте ги во кутија.

„Macarons“ се светски популарни десерт колачиња кои многу наликуваат на мини хамбургери во светли бои.

Зборот „macaron“ е изведен од италијанскиот збор „maccarone“. Се верува дека овие колачиња ѝ биле претставени на Франција од Италија околу 1533 г., кога Кетрин ди Медичи била кралица на Франција. На почетокот макаронсот се правел само од едно колаче, кога Пјер Дефонтен, сопственикот на  „Ladurée“ (многу позната и луксузна француска пекара), залепил две колачиња со ганаш крем и овој рецепт станал толку многу популарен во Франција, што денес го нарекуваат скапоцен камен на француското пекарство. Доколку имате можност да го посетите Париз, топло ви препорачуваме да ги пробате, затоа што велат дека францускиот путер им дава уникатен вкус.

Овие мали колачи се направени од две тркалезни школки, кои се залепени со фил. Школките се прават од белки од јајца (кои се оставаат надвор од фрижидер една ноќ), шеќер во прав, бадемово брашно и шеќер во гранули. Постојат бескрај варијации на филот којшто може да се користи во изработката на овие слатки задоволства, но најпознати се ганаш филот, овошен фил, фил со путер и со овошни џемови. Интересен е фактот дека макаронсите се едни од ретките продукти за кои употребата на обојувачи е широко прифатена во слаткарството. Нивните различни бои овозможуваат полесно разликување на нивните вкусови во продавниците.

Макаронсите најчесто се прават во големина доволна за да бидат изедени во 1-2 залака, со дијаметар 3-5 см. Што се однесува до калориите, можат да содржат 70-100 калории, во зависност од филот. За споредба еден капкејк содржи околу 400 калории. Тие не треба да бидат многу благи или филот да тече од нив. Кога ќе гризнете од ова колаче, ќе забележите дека има деликатна коричка, како лушпа од јајце. Под неа се наоѓа влажно и нежно колаче со меко полнење.

Честопати, колачите macarons се мешаат со слатките macaroons, главно поради сличноста во изговорот. Но, постојат многу разлики помеѓу нив. Macaroon е меко колаче направено од белки од јајца, шеќер и кокос, често потопени во чоколадо, кое не изгледа ни приближно толку привлечно како macaron.

Иако популарноста на овие колачи секојдневно расте на нашите простори, не можеме да ги најдеме во многу продавници. Се надеваме дека ќе инспирираме некој да отвори нов бизнис. 

Ќе останете без коментар: Рецепт за вкусни макаронс

Макаронсот е вистински хит десерт кој полека си доби свои обожаватели. Помеѓу двете лесни и вкусни колачиња се наоѓа сочен крем.

Потребни состојки:

• 4 белки
• 70 гр. шеќер
• 230 гр. мелени бадеми
• малку сол
• прехранбена боја
• фил по желба (какао крем, џем, слатка павлака, шлаг крем...)

Подготовка:

1. Загрејте ја рерната на 150 степени

2. Белките и шеќерот матете ги со миксер, додека не добиете цврст шлаг. Потоа додадете ја прехранбената боја и матете уште малку

3. Просејте го бадемот, шеќерот во прав и солта два пати за да бидете сигурно дека сте ги отстраниле сите грутки. Постепено и внимателно спојте ги со шлагот од белките. Смесата треба да биде соединета и густа, да не се разлева.

4. Во плех поставете хартија за печење, а потоа со шприц нанесете ја смесата и формирајте топчиња. Потоа печете 15 до 20 минути.

5. Спојте ги двете колачиња и филувајте помеѓу. За тоа можете да користите џем или слатка павлака, крем шлаг или обична растопена чоколада. 

Пријатен апетит!

Состојки
90 гр. белки
40 гр. шеќер
200 гр. шеќер во прав
110 гр. бадемово брашно
прстофат сол
малку прехрамбена боја во прав
Фил
100 гр. црно чоколадо со што поголем процент какао
80 -100 мл. слатка павлака
1 голема лажица шеќер во прав
1/4 мала лажица лут црвен пипер или чили во прав

Прекрасни слатки, едни од најпознатите француски десерти. Сега ќе го кажам моето искуство, како на најлесен начин да се подготват.
3 дена порано се оделуваат 90 грама белка и се оставаат во фрижидер.
1 ден порано се подготвува ганаш - во еден сад се ставаат шеќерот, чоколадото и лутиот црвен пипер, слатката павлака се загрева и му се додава на чоколадото, се меша додека се растопи чоколадото и се остава во фрижидер (филот може да се подготви и истиот ден кога ќе се прават макаронсите).
За подготовка на макаронсите белките се вадат од фрижидер и се оставаат на собна температура. Кога ќе се стоплат белките се ставаат во метален сад (садот задолжително треба да биде метален), се додава солта и шеќерот и се мати во зависност от тоа каков миксер користите матењето трае од 3 до 7-8 минути (меренгот трба да биде многу густ).
На смесата од белките се додаваат претходно пресеаните шеќер во прав и бадемовото брашно Најдобро бадемово брашно е домашното, а за подготовката на брашното, бадемите се ставаат во топла вода, по таков начин многу лесно се лупат и потоа се мелат со мелничка на многу ситно. Бадемовото брашно и шеќерот во прав се додаваат на 3 пати и се меша со техника фолдинг (со шпатула или лажица се меша внимателно по ѕидот на садот, се стигнува во средината и со лажицата или шпатулата се повлекува кон спротивната страна на садот). Оваа техника многу лесно може да се најде на интернет, треба да се направат некаде 60-65 движења со лажицата или шпатулата и смесата за макаронсите е готова.
За формирањето, во плех се поставува хартија за печење и со една мала кружна модла или мала чашка се цртаат кругови за по лесно постигнување на еднаква форма.
За печењето најдобро е да пробате со малку од смесата и да прецените сами, затоа што секоја рерна е различна, јас ги печев на 120 - 125 степени за 20 -23 минути.
Испечените слатки се оставаат да се изладат целосно за да може полесно да се одлепат од хартијата.
Готовите слатки се групираат по две горе - долу еднакви по големина. Во средината се става од филот, се залепуваат и макаронсите се готови.

Забелешка - сите продукти треба да бидат внимателно измерени. Белките се матат во метален сад и за да не се изместува хартијата за печење на четирите агли од плехот се става по малку од смесата и врз него се става хартијата за печење.

Состојки
За паста
125 гр фино мелени бадеми
125 гр шеќер во прав
40 гр белки
прехрамбена боја
За сјаен снег од белки
40 гр белки
110 гр шеќер + 2 лажици вода за шеќерен сируп

Имешајте ги фино мелените бадеми и шеќерот во прав. Мелените бадеми можат понекогаш да бидат груби, па кратко испулсирајте ги во бледнер за пофино да се иситнат, бидејќи како е познато, фината текстура на колачите многу зависи од тоа колку се поситно мелени бадемите.
Потоа, додадете точно 40 гр белка и измешајте густа паста. Додадете прехрамбена боја и убаво соединете ја во пастата. Пастата, е всушност основната база на макаронсите. Оставете на страна.

Другите 40 гр белки ставете ги во одделна чинија и матете со миксер до средна цврстина. Додека ги матите поместувајте ја чинијата (лево-десно со поткревање од страна) за да можи што повеќе воздух да навлегува.
Пред да започните со матењето на белките растопете го шеќерот со 2 лажици вода во сируп. Држете го на топло до времето на употреба за да не ви се здрви (како мене). Сега, сирупот додавајте го постепено, во неколку наврати во белките и постојано матете со миксерот. Снегот од белки сега ќе добие сјајна структура, многу посјајна отколку ако директно се додава само шеќер.

Време двете смеси да се измешаат меѓусебно. Снегот од белки се додава во пастата/основата, а не обратно, бидејќи се запазува воздухот кој навлегол со матењето на белките да се задржи. Ако додавате паста во белки, од тежината на пастата можи да се истисни воздухот од белките. Време е за мешање. Се меша од долу нагоре во еден правец и повторно се внимава да не се истиснува воздухот попримен во смесата. Лорејн вели, да се меша и брои точно 50 пати. Повеќе или помалку ќе влијае на стуктурата на колачите.

Смесата е готова. Сега треба да се стави во шприц со кружен отвор со средна големина (не како мене со кратер : ) ) и да се изтиснуваат врз пек хартија макаронсите. Лорејн посочува мал трик како не би бегала хартијата додека се истиснуваат колачите-на секој агол става по малку од смесата и врз неа ја поставува хартијата. Јас не сакав да го валкам плехот, па ризикував да испрскам на сите агли со натопени раце по малку вода и така да ја залепам хартијата. Испадна дека не сметаше ништо, барем не овој пат.
Истиснувајте ги макаронсите со големина која ја посакувате, при што ќе внимавате да оставите простор, бидејќи ќе се рашират, да не се слепат меѓу себе.

Кога ќе ги истискате, време е за мазнење. Тавата се треска од работната површина неколку пати за да се изремнат одозгора и во меѓувреме да попримат воздух во структурата. Трескајте ја тавата неколку пати од секоја страна за да можат сите еднакво да се израмнат.

Оставете ги така 15-20 мин. Пред да печите проверете со нежен допир дали лепат на рака. Потребно е да имаат фатено кора одозгора, која нема да лепи, во спротивно оставете ги уште 10 мин и пак проверете.

Лорејн печеше со отворена рерна за да не примале влага. Јас ја искористив постапката на печење од рецептот за макаронс на Лили и се покажа многу успешна--- Рерната се загрева на 180С. Пред да се стават макаронсите да се печат, се намалува на 160С. Се ставаат и се печат 12-15 мин. После 12 мин се проверува со рака цврстината, т.е. дали игра колачот за да допечите уште некој минут или се готови.

Оставете ги да оладат и потоа внимателно вадете ги. Лили, има финтица како се спасува залепен макаронс (не ви го раскажувам, прочитајте си кај неа : ) ) Мене, ми залепија 3... можеби затоа што не можев да дочекам да изладат „поштено“ . Финтицата е за оладени и стрпливи : ) Значи, бидете стрпливи, нека оладат.

Бидејќи беа експериментални, мој прв обид за макаронс, филот неофицијално ќе ви го раскажам овде. Правен „од нога“ онака, пробно, инстантно... Во загреана слатка павлака растопив 1 чоколадо за готвење и кога се растопи тргнав од оган и додадов 2 разбиени жолчки. Вратив на исклучена рингла да се спојат и потоа со лажичка ги лепев ( шприцот кога најмногу ќе ти треба ќе те издаде. Го одбираш најникаквиот, оти другите се запикани некаде на скришно место и те мрзи да ги бараш, и овој на крај се распаѓа)

Забелешка во врска со претставениот рецепт освен случката со шприцот
Сирупот за белките јас пред време го направив. Додека полека решив да ги разматам белките и дојде време за негово турање, тој се беше здрвил-камен!. Исклучив миксер, морав да додадам уште една лажичка вода и што побрзо да го стопам. Можеби тоа е резултатот што делот со трескањето на тавата кај мене не требаше. Тие сами уште веднаш по истиснувањето си се разлеваа. Мислев дека се промашив, а ги испеков онака за да го комплетирам неуспехот. Но, кога ги видов оформените прстени, летна разочарувањето и надеж се појави : ) Крцкави одозгора, меки од внатре и така малку поголеми само од нормалните. Останаа скриени 2. Лили убаво си пиша кај неа. Трба да одстојат за да се сети она што треба да се сети ; ) , секако повкусни од првиот ден.

Ах, уште една работа, во запис- Мерејќи ги белките, во првото мерење од 1 јајце добив точно 41 гр белка. Второто беше помалку. Знаев дека има врска бојата на лушпата на јајцата и за друго, а сепак битно нешто. Белите јајца имаат повеќе жолчка за сметка на белка во составот, а темните обратно. Имајте си го во предвид овој факт и за други потреби. Значи потребни се 2-3 јајца за овој рецепт. Ако користите темни со големина XL , можеби ќе помините само со 2 јајца.
И најважното, белките . т.е јајцата мора да се одстоени на собна температура барем 2-3 саати и повеќе пред да започните со рецептот.