14. Плаза Мајор

Најпознатиот плоштад во Мадрид, Шпанија, овој импресивен градски плоштад, е еден од главните станици на секоја туристичка посета. Првично изграден надвор од градските ѕидини, Плаза Мајор бил место за борби со бикови, пазари, симфонии, фудбалски натпревари и егзекуции. Статуата на Филип III е во средината, наспроти прекрасно обоената Каса де ла Панадерија, некогашното седиште на пекарскиот еснаф.

13. Плаза де Мајо

Откако била местото на револуцијата на 25 мај 1810, која довела до независност, Плаза де Мајо е централна точка на политичкиот живот во Буенос Аирес и, веројатно, во цела Аргентина. Неколку од главните знаменитости на градот се наоѓаат низ целата Плаза, меѓу кои и Кабилдо (градскиот совет за време на колонијалната ера). Во центарот на Плаза де Мајо е Пирамидата на Маите, најстариот национален споменик во Буенос Аирес. Од 1977 година плоштадот е местото каде што Мајките на Плаза де Мајо се собраа со знаци и слики од десапаресидосите (исчезнати), нивните деца, кои биле жртви на присилно грабнување од страна на воената хунта.

12. Трафалгар сквер

Трафалгар сквер е голем градски плоштад – споменик на победата на лорд Хорацио Нелсон над морнарицата на Наполеон во битката кај Трафалгар во 1805 година. Централен споменик во рамките на плоштадот е еден висок столб на кој фигурата на Нелсон гледа над Лондон. Неговиот споменик е опкружен со четири колосални лава и серија големи фонтани. Многу повеќе од само плоштад, Трафалгар сквер е еден од најпознатите плоштади во Обединетото Кралство и стана социјална и политичка локација за посетителите и за лондонци.

11. Зокало

Лоциран во срцето на историскиот центар на Мексико Сити, Зокало е еден од најголемите плоштади во светот. Тој е опкружен со Метрополитен-катедралата на север, Националниот дворец на исток, како и со голем број други историски градби. Во центарот се наоѓа огромно мексиканско знаме, кое свечено се крева и се спушта секој ден. Градскиот плоштад е збиралиште на Мексиканците уште од времето на Ацтеките, кога бил место за одржување церемонии.

10. Гран плаз

Гран плаз (или Грот маркт) е централниот градски плоштад во Брисел, Белгија. Тој е опкружен со еснафски седишта, градското собрание и Кралската куќа (или Куќа на лебот, според пазарот на чие место била изградена). Заедно со Атомиумот и со Манекен Пис (статуата на малиот мочко), плоштадот е најважната туристичка дестинација во Брисел. На секои две години во август на Гран плаз се поставува огромен „цветен тепих“ на неколку дена. Тогаш голем дел од плоштадот е покриен со милиони шарени бегонии.

9. Староместске намести

Староместске намести (Стариот плоштад) во Прага, Чешка, се наоѓа помеѓу Вацлавскиот плоштад и Карловиот мост и во лето често е преполн со туристи и со локални жители. Одликувајќи се со различни архитектонски стилови, меѓу кои и готската катедрала Тин и барокната црква Свети Никола, градскиот плоштад е оаза за патниците преморени од тесните улички во Прага. Меѓу многуте цркви, туристите на овој плоштад може да го најдат и Астрономскиот часовник, додека кулата на Старото градско собрание нуди панорамски поглед на Стариот град.

8. Пјаца Сан Марко

Пјаца Сан Марко е главниот плоштад во Венеција, каде што е општо познат како „Пјаца“. Пјаца Сан Марко е наречен и „Европска соба за цртање“ (според легенда што се поврзува со Наполеон). Тој е еден од најубавите градски плоштади во Европа, каде што човечките гласови преовладуваат над звуците на моторизираниот сообраќај. Базиликата на Сан Марко, една од главните атракции на Венеција, се наоѓа на источниот крај на плоштадот. Пјаца Сан Марко е најниската точка во Венеција и како резултат на тоа секогаш прв се преплавува за време на бури или дури и на пороен дожд.

7. Плоштадот Тјананмен

Плоштадот Тјананмен во Пекинг е најголемиот градски плоштад во светот. Опкружен е со споменици во советски стил и со владини згради. Плоштадот Тјананмен останува место за восхит кај туристите, и странските и оние од Кина, од кои многумина првпат доаѓаат во посета на својот главен град. На северниот крај на плоштадот в зори и на самрак се одржува церемонија на кревање и спуштање на знамето. Кај предниот дел на портата Тјананмен има 4 мермерни лава, од кои во стомакот на северозападниот лав има дупка од К*ршум од масакрот на плоштадот Тјананмен во 1989.

6. Ринек гловне

Како популарна туристичка атракција во Полска, главниот пазарен плоштад Ринек гловне во Стариот град во Краков е најголемиот средновековен градски плоштад во Европа, кој датира од 13 век. Плоштадот е опкружен со историски градски куќи, историски градби, палати и цркви. Во центарот на плоштадот доминира Салата на платното, изградена во 1555 година во ренесансен стил, на чиј врв има прекрасен таван. Над градскиот плоштад се извиваат готските кули на базиликата Света Марија.

5. Тајмс сквер

Познатиот градски плоштад во Њујорк, Тајмс сквер, се наоѓа на раскрсницата на Бродвеј и Седмата авенија и се протега од Западната 42-ра до Западната 47-ма улица. Место исполнето со видеоекрани, ЛЕД-знаци и трепкачки светла; врвна атракција или туристички кошмар, во зависност од личниот вкус, „новиот“ Тајмс сквер е семеен тематски парк со тематски ресторани, театри и хотели, како и бизнис-област во развој. Светлата и знаците може да се видат во секое време, но најволшебното искуство доаѓа ако го посетите Тајмс сквер ноќе, кога сите знаци и екрани блескаат во разни бои. Тајмс сквер е исто така добро познат по славното спуштање на топката на Нова година.

4. Свети Петар

Плоштадот Свети Петар се наоѓа веднаш пред базиликата Свети Петар во Ватикан, Рим. Колосални тоскански колонади го врамуваат трапезоидниот влез во базиликата и масивниот елиптичен плоштад пред него. Во центарот на елипсата стои египетски обелиск, кој бил пренесен од Египет во Рим за време на владеењето на царот Октавијан Август. Тој бил преместен од циркусот на сегашното место во 1586 година под раководство на папата Сикст Петти. Во средниот век се верувало дека позлатената топка на врвот на обелискот ја содржи пепелта на Јулиј Цезар. Сепак, кога античката метална топка била отстранета, била најдена само прашина.

3. Пјаца дел Кампо

Еден од најголемите средновековни градски плоштади во Европа, Пјаца дел Кампо, е главен јавен простор во историскиот центар на Сиена, Тоскана, Италија. Тој е познат во целиот свет по својата убавина и архитектонска целовитост. Плоштадот во облик на школка го опкружуваат Палацо Паблико и неговата позната кула, како и разни палати што им припаѓаат на најбогатите семејства во Сиена. Трките со коњи Палио ди Сиена, кои се одржуваат двапати годишно, се состојат од кружење трипати околу Пјаца дел Кампо, што обично трае не повеќе од 90 секунди.

2. Џемаа ел Фна

Џемаа ел Фна е врв на секоја посета во Маракеш и една од главните туристички атракции во Мароко. Дење овој плоштад во голема мера е исполнет со скротувачи на змии и луѓе со мајмуни, како и со некои повообичаени тезгиња. Како што одминува денот, понудата на забава се менува: скротувачите на змии си заминуваат, а во попладневните и во вечерните часови плоштадот станува преполн со раскажувачи на приказни, магионичари и продавачи на традиционални лекови. Како што се спушта мракот, плоштадот се исполнува со десетици тезгиња со храна.

1. Црвениот плоштад

Црвениот плоштад се наоѓа во срцето на Москва и е првата дестинација за повеќето посетители во градот. Плоштадот е опкружен со катедралата Свети Василиј, Државниот историски музеј, Мавзолејот на Ленин и со еден од долгите ѕидови од тули на Кремљ. Името Црвен плоштад не произлегува ниту од бојата на тулите околу него, ниту од врската помеѓу црвената боја и комунизмот. Името доаѓа од рускиот збор „краснаја“, кој може да значи или „црвен“ или „убав“. Овој збор првично се однесувал на катедралата Свети Василиј, а потоа бил пренесен и на блискиот плоштад.