Тој истакна дека е очигледно дека амбиентот за бизнис во Прилеп се подобрува бидејќи само последните неколку дена четири компании имаат најавено влез во индустриската зона Прилеп 1.

Ставрески посочи дека можност за вработување прилепчани ќе имаат и во „Дрекселмаер“.

- Имам добра вест за прилепчани – 500 до 600 работни места во „Дрекслемаер“ ќе бидат пополнети со кадар на луѓе од Прилеп. Тоа го договоривме на вчерашната средба со раководството на фабриката, со цел да се даде приоритет на луѓето од Прилеп, односно оние кои се невработени да најдат работно место во „Дрекселмаер“ – вели вицепремиерот Ставрески.

Ставрески укажа дека Владата и понатаму останува отворена за нови инвестиции, како за странски така и за домашни инвеститори. На инвеститорите кои ќе отвараат нови работни места ќе им се дадат најповолните услови за инвестирање. На овој начин ќе се решава проблемот со невработеност на младите.

Вицепремиерот ја поздрави инвестицијата на „Филип Морис“ во Тутунски комбинат „Прилеп“ и истакна дека со влезот на овој светски бренд во комбинатот значително ќе се подобри неговата состојба.

-Со влезот на „Филип Морис“ во Тутунскиот комбинат од Прилеп имаме еден стабилен партнер кој ќе ја обезбеди стабилноста и ликвидноста на Тутунскиот комбинат, ќе се обезбеди поголем откуп на тутун и со тоа задржување на работните места и подобар резултат на Тутунскиот комбинат во иднина – додаде Ставрески.

Договор за реализирање на инвестицијата на компанијата Гентерм во индустриската развојна зона Прилеп беше потпишан денес во Владата на Република Македонија.

Компанијата ќе вработи околу 2.000 лица, а производствениот капацитет ќе се протега на 21.500 метри квадратни.

Советникот за странски инвестиции во кабинетот на премиерот Никола Груевски, Алек Никовски, истакна дека оваа брзорастечка глобална компанија ќе отвори најсовремен погон во Прилеп, а инвестицијата е вредна 20 милиони евра.

Директорот на компанијата Гентерм за Европа, Јорг Еверс, истакна дека по извршените анализи одлучиле дека Македонија е најдобар избор за нив за понатамошна изградба на нивните капацитети.

-Се одлучивме за Македонија поради достапноста на работната сила, која е мошне добро едуцирана и поради добрите инвестициони можности кои ни ги овозможи Владата. Во производствениот капацитет во Прилеп ќе произведуваме појаси, клима уреди за автомобили, кои ќе ги продаваме на европскиот пазар. Производствениот капацитет во Прилеп ќе биде отворен во октомври, посочи Еверс.

Директорот на дирекцијата за технолошко-индустриски развојни зони, Виктор Мизо, потенцираше дека компанијата веќе работи на избор на менаџерски тим, кој ќе биде испратен на обука во Украина, каде Гентерм веќе има свој производствен капацитет.

Компанијата Гентерм вработува околу 9.000 лица во сите свои капацитети, а производите се наменети за Ферари, Бентли, БМВ, Крајслер, Фиат и останати автомобилски компании.