Научниците од University of Missouri објавија резултати од студијата која проучуваше како луѓето кои ќе ги одвоите од паметните телефони решаваат тестови, и колкав е ефектот  врз нивното знаење, анксиозност и физиологија.


Во студијата објавена во публикацијата Journal of Computer-Mediated Communication, научниците на испитаниците им внеле дополнителен немир на тој начин што им ги земале телефоните, но ги поставиле релативно близу до нив, па можеле да ги видат и слушнат како ѕвонат, но не смееле да ги допрат.

Доведувањето до таква ситуација на многумина им претставувало вистински хорор, па на сите тестови покажале послаби резултати, што сугерира дека сме станале поглупави ако до себе ги немаме нашите гаџети.


Помеѓу клучните откритија на оваа студија е заклучено дека во ситуациите кога не можеме да се јавиме на телефон кој ѕвони за време на решавањето на задачите, срцевиот ритам и крвниот притисок на испитаниците се зголемува, расте чувството на анксиозност и непријатност, што резултира со значително полоши резултати.


Ако мислите дека оваа студија не се однесува на вас, обидете се во друштво на некој пријател или член од семејството да ја повторите методологијата на ова истражување во вашиот дом, па пишете како сте поминале.