Среќен Роденден

Околу пладне во центарот на градот на пешачка патека ќе бидат поставени скулптури кои се изработени на Прилепското уметничко лето од автори гости од повеќе земји од светот.

Довечер се и двата културни настана - изложбата на инсталации во ликовната галерија на Домот на културата „Марко Цепенков“ на прилепскиот скулптор Атанас Атанасоски, како и гостувањето на театарот од Вараждин, Хрватска, со претставата „Го сакам Њофра”.

Утре, во пресрет на празникот, ќе бидат пуштени во употреба парк и зелено пазарче во периферна населба под Марковите Кули, а во центарот на градот ќе се одржи манифестација „Ајде на ролери”.

Утревечер се традиционалните манифестации - потсетување на настаните во предвечерието на 11 Октомври 1941, кога беше нападнат участакот- тогашната бугарска полициска станица, сега музеј „11 Октомври” , со што почна четиригодишната ослободителна борба на македонскиот народ против фашистичкиот окупатор.

За значењето на 11 Октомври на плоштадот Александрија ќе говори градоначалникот Марјан Ристески. Од 19 часот утревечер е и традиционалниот импровизиран напад на „Участакот”, а потоа е и огнометот во чест на празникот. На забавната програма во центарот на Прилеп за одбележување на празникот ќе настапат и повеќе прилепски музичари.

В недела, 11 Октомври, ќе им биде оддадена почит на сите загинати борци кои ги положија животите во НОБ како залог за слободата.

Свежи цвеќиња ќе бидат положени на Могилата на непобедените каде се моштите на 650-те борци кои ги даде Прилеп во четиригодишната ослободителна војна и на Алејата на народните херои, пред нивните бисти.

Почит ќе им биде оддадена и на Методија Андонов-Ченто, првиот претседател на Президиумот на АСНОМ, пред неговиот споменик во центарот на градот, и на 10-те загинати бранители на Карпалак, пред нивното спомен-обележје.

Во чест на 11 Октомври, ќе биде поставен и камен-темелник на новиот Арт плоштад во центарот на Прилеп.