• Македонија

Градоначалникот на општина Битола Владимир Талески денесka на аеродромот „Александар Велики“ во Скопје лично и го честиташе големиот успех на битолчанката Оливера Наковска-Бикова која претпладнево со својот златен медал пристигна од Лондон, каде учествуваше на Параолимписките спортски игри.

Ракувајќи со Накова-Бикова која во дисциплината „10 метри воздушен пиштол“ постигна светски рекорд и освои златен медал, битолскиот градоначалник најави посебен прием за славеничката со големо одличје и во нејзиниот роден град.

- Златниот олимписки медал е најубавата празнична честитка. Горд сум со постигнатиот успех, а наскоро ќе приредиме и посебен прием за олимпијката со најголемото одличје во Битола, посочи Талески.

Градоначалникот пред поаѓањето за Скопје, претпладнево во Битола учествуваше на свеченоста по повод прославата на 8 Септември и положи цвеќе на Споменикот на Народноослободителната војна во центарот на градот.
Посебни манифестации по повод Денот на независноста на Република Македонија организираа НУ Универзитетска библиотека „Св.Климент Охридски“-Битола која приреди изложба на книги од владиниот проект „1000 стручни книги“, НУ Завод и Музеј одржа изложба на постер-фотографии со наслов „Битола што ја нема“, а синоќа во старата чаршија детското ликовно студио „Св.Кирил и Методиј“ отвори изложба на слики од „Мал битолски Монмартр“ за чија вредност говореше претседателот на МАНУ, aкадемик Владо Камбовски.