Катарина Ивановска конечно ја уловивме во Скопје, бидејќи последниов период е во релација Америка – Македонија. За нејзината филмска улога сите веќе знаете, но она што не го знаете, а денес ексклузивно го објавува за читателите на “Здраво” е нејзината соработка со “Викторија Сикрет”!

Девојката која што ја започна својата кариера во 2004 година, соработуваше со најпознатите светски дизајнери и модни куќи, сосема залужено си го наоѓа и своето место во тимот на најубавите девојки од целиот свет на најпознатиот бренд за долна облека. Браво за Кики!

Во прилог може да ги погледнете и најновите фотографии снимени за потребите на августовскиот број на шпанскиот “Elle” и летната кампања за козметичката компанија “Lancaster”.

Здраво: Денес за “Здраво” ексклузивно објавуваме дека од неодамна Катарина Ивановска е дел од тимот на “Викторија Сикрет”. Претпоставувам дека ова значи многу за тебе и за твојата кариера. Како дојде до соработката?

Катарина: После 4 годни напорна работа и одење на кастинзи, изгледа им здосади на одговорните луѓе на “Викторија Сикрет” да ме одбиваат, па конечно ме “букираа” да сликам за нив ?. Снимав два пати до сега. Првиот пат долна облека за интернет страната што беше на некој начин и тестирање дали ќе им се допадне. За моја среќа им оставив добар впечаток и пред 5 дена сликав за главниот каталог за облека.

Здраво: Што се промени кај тебе на професионален план по стартот на соработката со “Викторија Сикрет”?

Катарина: Многу е рано за да кажам дека нешто се променило на работен план, но како и да е, “Викторија Сикрет” е клучниот момент кој ми се случи годинава и се надевам дека и понатаму ќе продолжам со кариерата по нагорна линија. Мене лично ако ме прашуваш, јас сум најсреќното девојче на свет.

Здраво: Знам дека долго време посакуваш да бидеш дел од некој филм и еве конечно ти се укажа шанса. Ти главен лик во филмот на Дарко Митревски.  Кажи ми нешто повеќе за тоа…

Катарина: Со Дарко се знаевме само 5 минути кога преку скајп ми понуди да ја глумам главната улога во неговиот филм и се разбира на мое огромно задоволство, ја прифатив. Филмот се вика “3-то Полувреме” и за неколку дена ќе почнеме со снимање. Да, јас ја играм главната женска улога или поточно ликот на Ребека, која е девојче на моја возраст и е еврејка. Целото дејствие се случува пред и за време на Втората Светска Војна. Чест ми е што ќе ја имам таа можност да бидам дел од една актерска елита. Имам секојдневни проби, шминка, костими, клавир, јавање и она што е особено интересно и морам да го напоменам е дека учам и ладино, јазик што го зборувале евреите- сефарди кој што денес го зборуваат само неколку илјади луѓе.

Здраво: Ти си одлична во она што го работиш, имаш долгогодишно искуство и огромен број на успеси. Но сега како актерка си во ситуација каде што си почетник. Се сомневаш ли можеби во себеси дали ќе бидеш поеднакво добра и во улога на актер?

Катарина: Благодарам за комплиментите. Максимално се залагам за се што ќе одлучам да направам и вложувам преголем труд. Па така и во овој проект сигурна сум и ветувам дека ќе дадам се од себе. Имам голема трема која за среќа се губи полека, но сепак без пеперутките во стомак и не е така слатко, нели? Очекувам голема подршка и помош од екипата зошто и ми е потребна. Благодарение на Дарко и Верица, која воедно ќе ја глуми Замила, мојата најдобра пријателка, ги поставив темелите и токму тие ми помогнаа многу во првите денови на читање на текстот и целата ситуација која е нова за мене. Мое е сега да продолжам со градењето на ликот.

Здраво: Точна ли е бројката за твојот хонорар за филмот која што простури низ медиумите? Вистина ли е дека си го искомплексирала Сергеј Трифуновиќ?

Катарина: Не и не и не!!! Сакаат да си го продадат бројот и да бидат читани, па пишуваат секакви наслови. Напротив со Сергеј Труфуновиќ имаме одлични пријателски релации.

Здраво: Еве ова е конкретен пример дека се пишуваат работи за јавните личности кои не секогаш се вистинити. Те погодуваат ли тебе дезинформациите или се водиш од правилото: “Само нека стават поголема слика“ ?

Катарина: Не поголема, туку во мојот случај понова зошто секогаш новинарите ги мрзи да побараат нови слики од мене на “google”, па ставаат постојано исти. Меѓутоа не ни пишуваат многу за мене, зошто трачеви всушност и нема. Во секој случај не ме погодуваат. Ги разбирам и нив. Како што кажав и предходно, треба да продадат број, а и тоа е дел од популарноста кој треба добро да го контролираш.

Здраво: Од друга страна пак, медиумите и ја величаат јавната личност. Конкретно за тебе, во светските весници кога ги објаснуваат Скопје и Македонија, велат дека тоа е родното место на Мајка Тереза и Катарина Ивановска. Ти годи ли тоа?

Катарина: Ова го пишуваше во лондонски весник правејќи компарација помеѓу Лондон и Скопје. Нормално дека многу се израдував , се почуствував како амбасадор на Македонија и горда сум на тоа.

Здраво: Беше во Њујорк за време на ураганот “Ирена”, а беше и меѓу оние кои што мораа да се евакуираат. Ајде раскажи ни како помина сето тоа …

Катарина: Хахах… Ова звучи: “И ти беше една од преживеаните!” ? Јас слетав со “Ирена”, живеам во близина на Вол Стрит, подрачје во кое мораа да се евакуираат сите жители. Со моете момче едвај најдовме соба во хотел во внатрешноста на Менхетен и ја преспавме буквално цела вечер. Американците како и секогаш сакаат драма, па тоа го најавуваа како крај на светот. На Менхетен освен дожд и ветер, немаше посериозни настани, но во Њу Џерси, делот кој излегува на океан и во Лонг Ајленд за жал имаше и жртви. За прв пат Тајм Сквер во 6 наутро беше како плоштад на духови, во супермаркетите имаше огромни редици, мислиш храна ќе престане да се произведува од утре.

Здраво: Луѓето мислат дека за да бидеш во модната индустрија доволно е само да бидеш убав , но не е баш така. Кои жртви мора да се направат за да успееш?

Катарина: Надворешниот изглед и не е секогаш пресуден за моделот. Нормално дека треба да поседуваш и внатрешна убавина, шарм, едноставно да зрачиш како однадвор така и однатре. Моделството е чекање и чекање и чекање. Далечината од фамилијата и пријателите е најголемата жртва за мене. Кога ја започнуваш кариерата уште од мали нозе, како јас, некако пребрзо се впушташ во светот на возрасните кој твоите врсници го искусуваат чекор по чекор. Од друга страна пак, предноста е голема. Се осамостојуваш порано и си оформена личност која може да се грижи и да одржува дури цела фамилија.

Здраво: Несомнено дека треба посебен начин на однесување во модната индустрија надвор од професионалните ангажмани. Меѓу другото, се дружиш и со многу познати луѓе од светскиот шоу бизнис. Си имала ли досега непристоен предлог?

Катарина: Досега сум немала таква ситуација. Мислам дека најважно е да знаеш како да се поставиш со околината. Сметам дека поседувам една доза на умереност на прв впечаток и запознавање, со секого знам како да се однесувам и до која граница можам да одам.

Здраво: Како го одржуваш своето тело?

Катарина: Со секојдневна физичка активност. Еве сега додека сум во Скопје, се качувам пешки до Средно Водно или пак трчам на кеј. Внимавам на тоа што внесувам во исхраната. Не сум љубител на брзата храна. Отсекогаш сум се хранела со домашните специјалитети на мајка ми кои за жал се поретко ги прави. Задолжителни ми се витамините, два литра вода и секое утро појадувам житарици. Кога имам време одам на масажи во “Afrodita S”и во последно време, морам да признаам, постојано купувам креми за тело што ја одржуваат витката става.

Здраво: Што има ново на љубовен план?  Знам дека имаш ново момче…

Катарина: Пааа заљубенаа сум :-)… Да, имам ново момче… што и не е баш ново.. Мислам дека дадов исцрпен одговор!!!

Здраво: Кој е твојот следен предизвик?

Катарина: Да стапнам на лудиот камен… но за едно 10 години :-)! Ме очекува многу работа, многу нови имиња, но рано ми е да откривам, тоа ќе го чувам за следна прилика. После филмот во Македонија се надевам дека и Холивуд ќе ме види некој ден, зошто да не?!

Вчера во јавноста излезе многу голема вест, како за самата Катарина Ивановска, така и за целата македонска јавност. Имено, нашата најуспешна манекенка потпиша договор со модната куќа Victoria’s Secret и официјално стана првиот македонски „ангел“.

Она што сега го откривме е дека Кики всушност ќе ја заменува прекрасната Алесандра Амбросио. Бразилската бомба, која е бремена со второ дете, наскоро ќе оди на породилно отсуство, а атрактивната Македонка е избрана за нејзина замена.

- По четири години напорна работа и одење на кастинзи, мислам дека на луѓето од Victoria’s Secret им здосади постојано да ме одбиваат, па на крајот мораа да ме ангажираат. Првиот пат направив едиторијал за нивниот каталог за долна облека. За среќа, им оставив добар впечаток, па од тогаш ме земаат и за посериозни ангажмани, изјави Катарина во едно интервју минатата година.

Сметаме дека Алесандра се здоби со сериозна конкуренција и едвај чекаме да ја видиме Кики на спектакуларните ревии заедно со најпознатите манекенки, како Адријана Лима, Каролина Куркова, Миранда Кер, Кендис Сванепоел и тн. Убаво лице, специфична убавина, идеално тело и многу сексапил во едно е формулата за влез во Victoria’s Secret. Погледнете ги фотографиите и воочете зошто токму Ивановска е избрана од модната куќа која претставува најголем престиж за секоја светска манекенка.

http://www.idividi.com.mk/stil/woman/740387/index.html