Американско оружје во Тајван, Кина беснее

Далај Лама

Кина го заострува тонот кон САД - по Тајван, проблем е и Далај Лама - Пекинг го предупреди американскиот претседател Барак Обама да не се сретнува со него за време на посетата на Америка месецов.

Ќе биде ли духовниот лидер на Тибетанците последниот кинески нерв што ќе го погоди Вашингтон и ќе ги наруши билатералните врски? Пекинг предупреди: таква средба ќе ја поткопа основата на билатералните односи меѓу двете земји.

„Се надеваме дека нема да дојде до тоа, но ако сепак дојде, ќе преземеме соодветни мерки за дотичните земји да ја сфатат својата грешка“, изјави Зу Веикин од кинеската Комунистичка партија.

Пекинг веќе упати остра реакција до Вашингтон со закани за санкции против американските компании во Кина ако САД му продадат оружје на Тајван.

За Обама предизвик и на друго поле - Пентагон тврди дека Иран веќе има ракети способни да погодат цели на Блискиот Исток и Источна Европа. Сепак, со неуспех го заврши првиот тест за одбрана од ваков напад - потфрлил радарот кој требало да го регистрира.

За овие проблеми, но и за економијата, здравствените реформи и безбедноста Обама им даваше отчет на Американците на „Youtube“.

„Се надевам дека ќе го правиме ова почесто, бидејќи ме приближува до народот и до нивните одлични идеи“, рече Обама.

И додека од Белата куќа соопштија дека од 630 илјади добиени прашања претседателот одговорил на најголемиот дел, медиумите велат дека Обама не добил ниедно поостро прашање, ниту пак кажал нешто ново.