18-годишна девојка две години закована за кревет

Потребни се уште 3.000 евра за Ивана да прооди

Виолета Кожинкова	Коментари (5)

Ивана Јанева

Од шансата да прооди по вторпат 18-годишната Ивана Јанева од штипското село Таринци ја делат уште 3.000 евра. Уште толку и се потребни за да може на 17-ти јануари да замине во Истанбул на операција на рбетот.

„Да ги собереме за оваа недела уште трите илјади евра за да можеме на 17-ти да појдеме во Турција и на 18-ти да ја оперираат“, вели Тодорка Јанева, мајка на Ивана.

Приказната за Ивана Јанева, девојката врзана за кревет по неуспешната операција на рбетот, А1 ја објави десетина дена пред Нова година.

Веднаш почнаа да пристигнуваат понуди за помош. Се организираа и неколку хуманитарни забави и концерти.

11 штипски рок бендови синоќа свиреа за здравјето на Ивана, а караоке забава организираа и кумановчани.

„Навистина се надевам дека ќе се соберат доволно пари за да може девојката да се оперира и повторно да може да оди и да биде повторно здрава“, вели Марк Ентони Марфи, сопственик на кафуле од Куманово.

Откако разбра дека има можност повторно да оди, Ивана сега живее во надеж.

„Се надевам дека хуманите луѓе ќе донираат уште за мене, сега само мислите ми се во тоа дали ќе се соберат пари за да можам да се оперирам“, вели Ивана Јанева.

Операцијата во „Американ хоспитал“ во Истанбул, што чини вкупно 8.000 евра, за Ивана е можност да живее нормално и засега е единствен излез од малата собичка чии четири ѕида веќе две години се целиот нејзин свет.

Сметка за помош на Ивана:

Трансакциска сметка- 200001808025963

Стопанска банка

Ивана Јанева

http://www.a1.com.mk/vesti/default.aspx?VestID=118408