Деновиве владејачката ВМРО-ДПМНЕ повторно го актуализира прашањето за пописот и до својот коалициски партнер ДУИ достави два предлога како тој да се спроведе. И двата предлога главно се базираат на административно пребројување на населението, при што ќе треба да се вкрстат податоците од повеќе државни регистри. Едниот предлог предвидува и теренска проверка за неколку прашања. Според најавите, пописот, кој би го финансирала Светска банка, најрано би можел да се спроведе за две и пол години. 

Но, се чини работите не се помрднати ни милиметар од таа 2011 година зашто вицепремиерот Муса Џафери неодамна изјави дека ДУИ не е против административен попис, но оти тој не треба да се оптоварува со евиденција на граѓаните што влегле или излегле од државата. Значи, повторно проблеми со стандардите, а без нив не е можен ни попис кој реално ќе ја отслика состојбата на теренот. Пораката што доаѓа од ДУИ е уште позгрижувачка зашто од партијата нагласуваат дека пописот не им е во приоритетите. Оваа порака треба да се анализира меѓу редови зашто на крајот испаѓа дека може да стане приоритет, но ако се спроведе според стандарди што ќе ги прифати ДУИ. Тоа, пак, значи дека се игра на картата на процентите и уште сега пописот се пушта во политички води.