Умре Мајкл Џексон

Мајкл Џексон, „Кралот на попот“ кој еднаш месечареше над музичкиот свет, умре во четвртокот додека се подготвуваше за враќање во музичкиот свет по кошмарните години исполнети со сексуални скандали и финансиски проблеми. Имаше 50 години.

Џексон почина во медицинскиот центар UCLA откако доби срцев удар во неговиот изнајмен дом во Холмби Хилс. Докторите се обидувале да го реанимираат во неговиот дом околу 45 минути, потоа го однеле во болница, каде што продолжиле да работат на неговото спасување.
„Мислат дека претрпел срцев удар во неговиот дом. Сепак, причината за неговата смрт ќе остане непознатата сè додека не се видат резултатите од аутопсијата“, изјави неговиот брат Џермејн. Полицијата вели дека ги истражува причините за смртта и дека се споредува стандардна процедура која е типична за вакви случаи.

Неговиот албум од 1982 година „Thriller“, во кој беа вклучени големите хитови „Beat It“, „Billie Jean“ и „Thriller“, е најпродаваниот албум на сите времиња, со продадени повеќе од 50 милиони примероци во целиот свет.

Во времето на неговата смрт Џексон напорно работеше на она што требаше да биде негово големо враќање: имаше договор за неверојатни 50 концерти во Лондон арената, кои требаа да почнат на 13 јули.

„Не е шега. Го нема веќе Кралот на Попот. Вау“, ја чита Мајкл Харис, 36 години, од Њујорк, смс пораката што пријателот му ја испратил. „Како кога Кенеди беше убиен. Секогаш ќе се сеќавам дека бев на Тајмс Сквер кога Мајкл Џексон умре.“

Тој најверојатно беше највозбудливиот изведувач на неговата генерација, познат по своето одење наназад, по трескавичното танцување во кое се фаќаше за препоните, по пеењето во високи тонови, испрекинато со вресоци и кикоти. Неговата тесна, светкава јакна во војнички стил и пилотски наочари за сонце станаа заштитен знак, како и неговото лице кое благодарение на операциите постојано се менуваше.

„За тоа што Мајкл Џексон ни беше одземен толку рано и толку неочекувано, за тоа едноставно немам зборови“, рече Квинси Џонс , продуцентот на „ Thriller“. „Тој беше беспрекорен забавувач и неговите заслуги и оставнина ќе се чувствуваат засекогаш. Денес го загубив мојот помал брат и дел од мојата душа засекогаш замина со него.“
Џексон заедно со Елвис Присли и Битлси е една од најголемите поп сензации на сите времиња. Кога накусо беше во брак со ќерката на Присли, Лиза Присли, ги обедини најголемите музички имиња. Смртта на Џексон веднаш предизвика споредби со смртта на Присли, кој во 1977 година умре на 42 години.

Како што годините поминуваа Џексон стана исклучително бизарна фигура – средовечен маж кој тешко може да се соочи со животот како возрасен. Кожата му стануваше посветла, носот потесен, а зборуваше со воздушест, женскаст глас. Често носеше санитарна маска на лицето додека патуваше, чуваше шимпанзо наречено Баблс и беше опкружен со деца на имотот Недојдија, имот од сликовница исполнет со играчки и животни. Таблоидите се потсмеваа со него нарекувајќи го „Wacko Jacko“.

„Мислам дека неговата внатрешност беше во судир со нормите што владеат во светот. Како да се бореше против гравитацијата“, изјави Мајл Левин, холивудски новинар кој го претставуваше Џексон на почетокот на 90-тите. Тој го нарекуваше Џексон „ученик на П. Т. Барнум“ и додаде дека ѕвездата изгледала кршлива но била „многу поитра и препредена во врска со музичката индустрија отколку што другите претпоставуваа“.

Џексон предизвика бес во 2002 година кога го загрози својот мал син, Принц Мајкл II, кога го подигна над балконот во хотелот во Берлин додека неговите обожаватели го гледаа одоздола.

Во 2005 година беше ослободен од обвинувањата дека злоупотребил 13 годишно дете на неговиот имот Недојдија во 2003 година. Беше обвинет дека на момчето му дал алкохол, го допирал и дека заедно со други деца го вклучил во чудно и несоодветно однесување.
Случајот следеше по години исполнети со гласини за релациите на Џексон со млади момчиња. Во еден телевизиски документарец, тој призна дека го дели креветот со деца, обичај што тој го опиша како сладок и без никакви сексуални елементи.

И покрај ослободителната пресуда, грозоморните обвинувања што се појавија во судот извршија многу лошо влијание врз неговата кариера и имиџ, па тој падна во сериозни финансиски проблеми.

Мајкл Џозеф Џексон е роден на 29 август 1958 година во Гери. Имаше 4 години кога почна да пее со своите браќа – Марлон, Џермејн, Џеки и Тито. По раниот успех, се одлучува за соло кариера, создавајќи иновативна и експлозивна музика.

Во албумот „Thriller“ се измешани мрачниот пристап на басот, тапаните и синтисајзерот на „Billie Jean“, чкрипавото Еди Ван Хален соло на „Beat It“ и фалсетите на „ Wanna Be Startin' Somethin“.

Дотогаш го зацврсти своето место во поп културата. Во 1978 година доби улога во мјузиклот „The Wiz“, поп верзија на „Волшебникот од Оз“, во која Дајана Рос се појави како Дороти.

За време на снимањето на рекламата за пепси во 1984 година, Џексон се здоби со изгореници на челото кога косата му се запали.

Во следните години се појавија два многу добри албуми, „Bad“ (1987) и „Dangerous“ (1991), но кариерата му тргна во надолна линија кога во 1993 година беше обвинет дека го малтретирал момчето кое често престојувало во неговиот дом. Пејачот ги отфрли сите обвинувања, се договори со семејството на момчето, подоцна излезе дека платил 20 милиони долари, а обвинувањата беа повлечени.

Џексон беше гневен за лошите критики на албумот од 1995 година „HIStory“, кој се продаде во повеќе од 2.4 милиони примероци, но тогаш популарноста на неговата музика опаѓаше.

Бил Верде изјави дека моќта на Џексон како музичка ѕвезда не може да се спореди. „Светот едноставно ја изгуби најголемата музичка ѕвезда во историјата, без разлика како ќе го сфатите тоа. Тој буквално е крал на попот.