Денес навршува третата годишнина од смртта на кралот на попот. Неговиот доктор е во затвор поради убиството, а неговото семејство се обидува да продолжи да живее нормален живот.

Мајкл Џексон (50) почина во својот кревет на 25 јуни 2009 година, откако зема преголема доза на пропофол, седатив којшто тој не смеел да го има крај себе.

Неговиот доктор Конард Муреј е прогласен за виновен за убиство од небрежност и моментално ја издржува својата затворска казна.

Тој му овозможил пристап на Џексон до пропофолот, анестетик кој се користи во болнички услови, а потоа го оставил сам. Кралот на попот почина од преголемата доза од овој лек, а дали тој самиот го земал, или докторот му го дал, веројатно никогаш нема да се дознае.

Докторот Муреј пред судот изјави дека не е виновен, но одби да сведочи.

Џексон зад себе остави три деца, Мајкл Принц (15), Парис (14) и десетгодишниот Принц. Првите две деца тој ги доби од бракот со медицинската сестра Дебора Роу, додека идентитетот на сурогат мајката која му го роди најмладиот син никогаш не го откри.

Децата сега се под старателство на мајката на Мајкл, Кетрин, и се обидуваат да продолжат да живеат нормален живот, колку што е тоа возможно.

Ќерката Парис неодамна гостуваше кај Опра Винфри и изјави дека се во животот со славен татко било необично.

Ни рече дека тој немал детство и дека сака ние во нашето детство да уживаме колку што е можно повеќе.

Ни беше чудно што моравме да носиме маски кога излегувавме надвор, но сега сфаќам што тато сакал да постигне со тоа. Тој ги сочува нашите лица, нашата приватност и ни овозможи нормално да одиме во игротеки и ресторани, без притоа никој да не познае", изјави Парис.

Џексон во 2009 година ја подготвуваше големата "This is it" турнеја, која на најспектакуларен начин ќе ја претставеше неговата дотогашна кариера со стотина илјади фанови ширум светот.

По неговата ненадејна смрт, неговите браќа со кои беше во групата "Jackson 5" најавуваа дека Мајкл "ќе започне" турнеја со нив во вид на холограм, но од реализацијата на овие планови се уште нема ништо.

Докторот на Џексон беше осуден во ноември минатата година, на четири години затвор.

Додека загрижените фанови сметаат дека ниту доживотната казна не би била доволна, многумина смртта на Џексон ја припишуваат на "навиката" познатите личности самите себе да се доживуваат како доктори и да земаат лекови кои всушност треба да имаат точно определена доза на консумација.

Овие навики беа кобни за неколку животи од светот на шоу-бизнисот, затоа што од лекарствата коишто ги земаа на своја одговорност, умреа и Ана Никол Смит и Хит Леџер.

Имено, аутопсијата утврди дека Џексон бил "подвижна аптека" и дека дневно земал по најмалку една рака полна лекови, па било само прашање на време кога срцето би му откажало од таквиот начин на живот.

Обожавателите на починатиот пејач Мајкл Џексон оставија на неговиот гроб во Лос Анџелес над 10.000 црвени рози и така ги одбележаа трите години од смртта на кралот на поп музиката.

Џексон почина на 25 јуни 2009 година на 50 години од преголема доза на лек. Личниот лекар на Џексон, Конрад Мареј, осуден е на четири години затвор во ноември минатата година за убиство на пејачот од негрижа.

Големиот мавзолеј каде се наоѓа ковчегот на Џексон, е затворен за јавноста, но неговите обожаватели ги оставаат цвеќињата и пораките пред стаклениот прозор, блиску до неговиот гроб.

Фановите на Џексон оваа година се здружиле и собрале 30.000 долари за да купат 10.000 црвени рози (омиленото цвеќе на пејачот).