Закон за бракови помеѓу хомосексуалци?

Европа бара заштита од дискриминација за различните сексуални групи

Нема бегање од заштитата врз основа на сексуалната ориентација во Европската Унија. Најавите за нацрт законот за антидискриминација ги алармираа сите активисти за човекови права во Брисел, а Европската Комисија чека да го разгледа во детали овој нацрт за да се произнесе, ни изјави денеска портпаролката на ЕК.

Таа јасно стави на знаење дека заштитата на хомосексуалната заедница е дел од европските вредности.

„Правниот поредок на ЕУ предвидува почитување на законите против дискриминација било да е тоа врз основа на раса, етничка припадност, старост, сексуална ориентација, верска припадност како и заштита на лицата со посебни потреби“, изјави Пиа Хансен, портпарол на ЕК.

За организациите кои се занимаваат со оваа тематика во Европскиот Парламент, најавите за нацрт закон кој експлицитно избегнува да ги заштити хомосексуалците во Македонија е рамно на испраќање негативен сигнал кон Европа, објаснува Бруно Селун.

„Сите земји членки на ЕУ имаат барем заштита од дискриминација врз основа на сексуалната ориентација во областа на вработувањето. Голем број од нив почнуваат да ја вметнуваат во други области како здравствената заштита или образованието. Советот и Европската Комисија во моментов работат на директива која ќе ја направи заштитата од ваквата дискриминација обврзувачка во сите области, не само во вработувањето. Штом оваа директива ќе се усвои, тоа ќе стане директен услов за влезот на Македонија во ЕУ“, вели Хансен.

Во Европа постојат две директиви кои мораат на некој начин да се преточат во националното законодавство. Првата се однесува на заштитата од дискриминација врз основа на етничка или расна припадност во сите области од општествениот живот. Втората директива се однесува на заштитата од дискриминација на работното место.

Во оваа директива јасно е наведена сексуалната ориентација како основ. ЕК се подготвува да донесе дополнителни директиви во областа на антидискриинацијата. Дури и во ултраконзервативната Полска сексуалната ориентација е правно заштитена.

Ако владата не најде храброст да ги заштити припадниците на оваа загрозена група, товарот ќе падне на пратениците во Собранието, од кои се очекува да покажат поевропски дух од Владата овојпат.

Извор: A1