Повторно вооружени терористи на косовска граница

Јасминка Догова
Ана Анастасовска

ВМРО-ДПМНЕ вчера се обиде да ги повлече обвинувањата што произлегоа од оваа партија претходниот ден, според кои опозициската СДСМ, во соработка со албанските партии и меѓународните претставници во Македонија, кове заговор за дестабилизација на земјата за да ја урнат владата на Никола Груевски. Претставници на владејачката партија се обидоа да се дистанцираат и од вчерашните пишувања на провладиниот весник „Вечер“ на истата тема, според кои конспирацијата била договорена на средба меѓу Мендух Тачи, Љубе Бошкоски и косовскиот политичар Рамуш Харадинај.
- Овие информации во „Вечер“ не се произлезени од ВМРО-ДПМНЕ - изјави вчера пратеник на оваа партија, кој сакаше да остане анонимен. Тој рече дека неговата партија не брифирала никого дека амбасадори учествуваат во дестабилизација на земјата, ниту дека СДСМ имала таква намера.
- Она што го кажавме беше дека СДСМ секогаш ги злоупотребува меѓуетничките односи како алатка за да дојде на власт. Не беше речено дека некој има сценарио за воена дестабилизација, а најмалку дека во тоа учествувале амбасадори - појасни вчера високиот претставник на партијата на брифинг со новинарите. ВМРО-ДПМНЕ ги поздрави настапите на Али Ахмети, кој повика Албанците да не наседнуваат на провокациите и на повиците за дестабилизација и поделба на државата.
СДСМ вчера уште еднаш ги отфрли обвинувањата дека учествувал во некакви сценарија на штета на Македонија и дека меѓуетничките односи ги користи како алатка за уривање на Владата. Тој тврди дека власта прибегнува кон вакви тешки обвинувања „секогаш кога не и оди“.
- Прво треба да се запрашаме кој ги создава лошите меѓуетнички односи? Ако оваа влада продуцира моноетнички проекти, како „Скопје 2014“, ако има двојни аршини за тоа дали да се гради црква или џамија на плоштадот, ако има внатре во коалицијата несогласување за проекти како што е изучување на албанскиот јазик за првачињата, задача на опозицијата е да ја предупреди за грешките што ги прави, дури и ако тоа некому му изгледа како уривање на власта - рече Бранко Црвенковски.
Лидерот на СДСМ негираше дека тајно се среќавал со други опозициски лидери затоа што, како што рече, „кога сака може да се сретне со нив јавно и нема причини да го крие тоа“.
- Се креира лажна слика за тоа кои се добри, а кои се лоши граѓани и политичари, односно луѓето се делат на предавници и на патриоти, што е погубно за државата. Груевски влегува во филмот на Љубчо Георгиевски од 2001 година, во кој практично сите му се предавници, сите му се виновни и сите работат против него. Се надевам дека се друго е различно од 2001 година и затоа не може да ни се повтори конфликтот. Меѓуетничките односи не дозволуваат импровизации и навреме треба да се идентификуваат проблемите и навреме да се решаваат. Ако постапува така оваа влада, ќе ја има поддршката од СДСМ - рече Црвенковски. Тој додаде дека опозицијата целосно ги осудува сите акти на насилство и ја поздравува акцијата на полицијата.
Во меѓувреме, поранешни припадници на ОНА и политичари од партиите на Албанците во Македонија тврдат дека не е забележано движење на вооружени поединци или на групни формации на теренот. Тие, сепак, нагласуваат дека од ден на ден расте незадоволството кај членовите на Здруженијата на ветерани, така што станува потешко да се контролира нивното однесување.
- Јас ги советувам членовите на Здружението да не се мешаат во такви екстремистички групи и да не се одметнуваат, но тешко ми оди разубедувањето. Луѓето се разочарани од игнорантскиот однос на власта, која не сака да им го реши статусот. Ситуацијата е сериозна - предупредува Абедин Зумбери, пратеник на НД и претседател на Здружението на ветерани на ОНА.
Хисни Шакири од Националната демократска унија, кој беше и еден од командантите на ОНА во Липковско, вели дека нема никакви сознанија за овие групации.
- Сигурно МВР знае повеќе за тие прашања. Во Липковско нема такви активности и не треба да создаваме паника кај луѓето. Тоа не е во интерес на нашите граѓани. Се знае кој е интересот на Македонија. Тоа не им одговара ниту на Косово ниту на Албанија ниту, пак, нам. Не им одговара ниту на Македонците бидејќи знаеме што ни донесе минатото - вели Шакири.
Од Демократска партија на Албанците посочуваат дека немаат информации за некакви вооружени групации и дека според нивните сознанија во тетовскиот регион е мирно.


Каде има чад, има и оган!


Загриженоста на надворешниот фактор за безбедноста на земјата не е залудна и штом така драматично апелира, значи дека има повеќе информации за тоа што се случува на теренот - вели Сефедин Харуни од ПДП.
Според него, нема простор за паника за влошување на безбедносната ситуација, но има простор за паника од политиката на премиерот Никола Груевски, „која ги влошува меѓуетничките односи“.
- Немам сознанија за некаква раздвиженост на теренот, но како и да е политиката која ја води Груевски, со потиснување на Албанците, ја води земјава во погрешна насока и не гледам шанса за разденување. Трпението, сепак, има крај - вели Харуни.


Полицајците на штрек


Извори во МВР посочуваат дека ситуацијата може да биде непредвидлива и дека полицијата е на готовс.
- Ни рекоа да бидеме подготвени за неочекувани сценарија. Постојат информации за кои уште не сме сигурни дека можеби одредени екстремистички групи се подготвуваат да дејствуваат. Засега немаме ништо поконкретно, но мора да бидеме подготвени - велат извори во МВР.

Превземено од ВРЕМЕ..

Четворица погинати во престрелка со полицијата

Очигледно ова нема крај.....