Цареви Кули - Струмица

Ги погледнав сите слики од Цареви кули, ,навистина се изненадив колку имаат ископано археолозите. Пролетта поминавме по новиот пат од Св.Илија кон овој локалитет и тогаш се почнуваше со ископини. Навистина преубави фотографии се надевам дека во целост ова место ќе се открие и заштити затоа што е најатрактивниот и препознатлив белег на градот Струмица.

Факт е дека локалитетот Цареви Кули долги години беше запуштен и недоволно истражен. Младата генерација археолози си зема за сериозна задача да го испита и да прокопа подлабоко под ѕидините на Царевите кули и еве дојде до некои откритија од кои се изненадени и самите археолози:

На Цареви кули монети со ликот на Филип Втори

На познатиот локалитет Цареви кули над Струмица деновиве се откриени наоди и елементи од периодот на владеењето на Филип Втори Македонски, што предизвика изненадување дури и кај археолозите.

Пронајдени се монети со ликот на Филип, потоа амфори, садови, кантароси, накит, фрагменти од сликани вазни, црнофиносувана керамика, фигури од малоазиски тип и други артефакти кои укажуваат на фактот дека Струмичката тврдина била населена кон крајот на четврти век пред нашата ера.

„Откривме прекрасен материјал од крајот на петтиот и од четвртиот век, попрецизно од македонско-хеленистичкиот период, датиран со монети на Филип Втори. Исто така дефиниран и доцноантичкиот бедем на оваа тврдина при што се откриени две кули од тој период“, вели археологот Зоран Рујак, раководител на овој истражувачки проект.

Сите досегашни наоди заедно со предисториската населба која беше откриена лани, недвосмислено укажуваат дека на овој локалитет опстојувале разни цивилизации во еден растеглив временски период - од праисторијата до средниот век, односно во период од околу седум илјади години.