РАКОМЕТ - новости

aha 

Металург "брка" рекорд на гледаност

Четврт-финалната пресметка од Купот на куп победниците меѓу Металург и Амичитија која ќе се одржи в сабота во "Борис Трајковски" би можела да стане најпосетениот ракометен натпревар во Македонија досега.

За првпат во "Борис Трајковски" е поставена уште една, четврта трибина која е сместена позади голот на северната страна на салата, под службените простории. Таа е помала од другите "М" трибини и има капацитет од околу 200 гледачи.

Со тоа "Борис Трајковски" ќе може да прими повеќе од 6200 гледачи и доколку се реализира тоа, службено ќе биде најпосетен меч досега.

Дуелите кои Македонија ги играше со Исланд засега го држат рекордот и доколку беше и тогаш поставена монтажната трибина сигурно ќе беше преполна. Истото важи и за дуелите на женската сениорска репрезентација на Македонија од Европското Првенство одржано во декември минатата година. Но, тогаш беа повелечени и трибините "М", кои се наоѓаат позади записничката маса на западната страна и со тоа капацитетот на салата беше намален за околу 500 гледачи.

Не ни осмелуваме да правиме споредби со дуелите на Кометал од неговата златна ера. Веројатно и стадион ќе беше премал за дуелите од 2002 на најславниот македонски клуб, но тогаш во Скопје немаше "саглам" сала, па едвај 2000 гледачи имаа задоволство да го гледаат мечот. Тука некаде е дуелот Пелистер-Лемго, нема официјална бројка за тој натпревар, но со оглед на официјалниот капацитет на салата во Битола, сепак, тоа е помал број.

За дуелот на Металург со Амичитија не владее еуфорија каква што нормално има кога игра репрезентацијата на Македонија, но далеку е поголема заинтересираноста да се гледа овој натпревар отколку што имаше на натпреварите за Кил и на Барселона на пример.

Активниот резултат од Цирих, убавото време и погодниот термин, шансата македонска екипа по четвртипат да се најде во 1/2 финалето на КПК, условите кои ги нуди "Борис Трајковски", но и растечката популарност на ракометот се причините поради кои се бараше билет повеќе деновиве. Посебно стратегијата која ја форсира Металург. Без навивачки групи, без организирано навивање, со спроведување на системот со нумерирани седишта што се покажува како "магнет" за се поголем број обични љубители на ракометот кои сакаат да дојдат во сала, да минат час и пол на ракометен натпревар и точно да знаат на кое седиште седат, поточно и да можат да си се вратат назад на своето место дури и да решиле да излезат надвор на воздух.

Атмосферата не е таа која ја има на натпреварите кога има навивачки групи, но е убава и привлечна, а Металург е презадоволен од ваквиот тренд и во зависност на резултатите кои ќе ги оствари во домашниот шампионат сезонава (да биде првак) во клупските планови стои и можност за комплетна преселба на клубот во "Борис Трајковски" за наредната сезона.

Во продажба според информациите од вчера претпладне имало останато уште околу 1500 билети кои се по цена од 100 денари.

Што се однесува до Металург, екипата веќе тренира во арената, од вчера е и во некој вид карантин. Прес-конференцијата за натпреварот се одржа вчера.

"Наша цел е да организираме уште еден натпревар во кој македонската публика ќе може да ужива. Пласман во полуфинале не е мала работа, ние не го претставуваме само Металург, ја претставуваме Македонија и мислам дека на секој љубител на спортот во државата ќе му биде мило да има македонски претставник во Европа во полуфиналето. Затоа сакаме и да ја задржиме концентрацијата и да не влетуваме во приказните кои деновиве се кружат низ цела Европа. Што се однесува до нас, нема случај Металург-Барселона. Ние сме кристално чисти и ова само може да ни одземе енергија, па затоа не сакам ништо сега да коментирам. Наскоро, ако треба ќе одржиме нова прес-конфренција на која ќе зборуваме само за тоа, сега најважно ни е да ја елиминираме Амичитија и да се пласираме во полуфиналето на КПК", вели потпретседателот на Металург, Филип Христов, кој вчера слично настапи и на официјалната прес-конференција.

Вести нови од таборот на Металург нема. Освен што на списокот на повредени е ставен и Олег Маљцев. Тој имаше проблеми и на натпреварот во Цирих, па затоа и не беше во составот за дуелот со В. В. Тиквеш одигран во средата.

За среќа, не се работи за нешто сериозно и тој в сабота ќе биде во составот. Деновите до мечот ќе се работи со намален интензитет.

Нема нови моменти ниту од Цирих. Најважното од таму: Енди Шмит ќе дојде и ќе игра. Повреден е, колку ќе биде кадарен да покаже, ќе видиме.

"Нас не не интересира, ниту се оптоваруваме со тоа дали и колку ќе може да игра Шмит. Се подготвуваме како тој да е 100 насто фит. Видовме за каква екипа се работи, знаеме со каков квалитет располагаат, но сметаме дека имаме реални шанси да ги елиминираме и да се пласираме во полуфиналето. Може да се види од нивните резултати дека добро играат и на гостински терен. Се трудиме да бидеме максимално сконцентрирани на тој меч. Маљцев има мали проблеми, но сметаме дека ќе биде подготвен да игра в сабота", изјави тренерот Звонко Шундовски, кој разбирливо не сакаше да навлегува во коментари за тоа што и како ќе игра Металург в сабота.

Средбата е закажана за 18:30 часот, а ја судат Литванците Мазејка и Гателис, кои се целосна енигма за македонскиот тим.

Металург достојно се прости од Европа

Македонскиот ракометен првак Металург го совлада швајцарскиот шампион Амичитија со 24:23 во реванш 1/4-финалниот меч од КПК, но не успеа да се пласира во полуфиналето бидејќи противникот во Скопје допатува со предност од првиот натпревар со два гола, кој заврши 31:29.

Одигравме неочекувано лошо прво полувреме, кое противникот го доби со 12:8. По одморот очигледно беше дека советите на тренерот на Металурзи, Шундовски вродија со плод, а како и што се очекуваше мечот кулминацијата ја доживеа во последните 10 минути од пресметката. Токму тогаш Металург го покажа своето вистинско лице, Борко во елемент бранеше и кога преполната сала "Борис Трајковски" ја гледаше топката во неговата мрежа, одбрана го достигна посакуваното ниво, Миркуловски 'украде' неколку топки за атмосферата да се вжешти до точка на вриење, а Јовиќ дополнително ја крена публиката на нозе со прецизните лоб удари од пенал. Особено што спроти себе го имаше вечерва расположениот до максимум противнички голман Васкевичиус. Чуварот на мрежата на Амичитија несомнено е и играч на натпреварот со 23 успешни интервенции зад своето име.

Но, и при водство од три разлика за нашиот тим на три минути до последниот судиски свиреж и речиси добиен натпревар, среќата ни го сврте грбот. Имавме можност и дефинтивно да го решиме прашањето на патникот во следната рунда во наша полза, но Јовиќ при резултат од 24:22 од пенал со силен удар меѓу нозете на Васкевичиус ја погоди пречката од противничкиот гол. Кратко потоа, во последните секунди од дуелот и противникот доби удар од седум метри, кој неговите играчи успешно го реализираа, ги поставија конечните Металург - Амичитија 24:23 и благодарение на предноста која ја остварија во првиот меч со победата од 31:29, се пласираа меѓу четирите најдобри во второто по ранг клупско натпреварување во ракометна Европа.

Во нашиот тим очигледно беше отсуството на тројцата стандардни ракометари: Маљцев, Димовски и Шмигиќ. Во такви околности Стојановиќ беше најпрецизен со 7 погодоци, Јовиќ постигна 6. Борко Ристовски мечот го заврши со 11 успешни интервенции.

Сепак, Металурзи достојно се простија од евро сцената, а публиката во преполната сала "Борис Трајковски" со аплауз ги испрати своите миленици кон соблекувалната. Новиот предизвик за тимот од Автокоманда е веќе в среда, кога го играат градското дерби со Вардар Про, кое најверојатно ќе го даде името на освојувачот на шампионската титула во домашниот шампионат.

Металург дојде до раскрсница

Сезоната од која Металург имаше големи очекувања финишира со "просечност" од која не се задоволни во клубот. По релативно успешно одработениот есенски дел и во првенството и во ЛШ дојде моментот кога требаше да се види дали Металург е кадарен да оди чекор напред или не.

Цела сезона беше подредена на двата дуела кои се играа последните денови. Тука требаше да се направи тој чекор што ќе ја направеше оваа година посебна за Металург, но тоа не се случи.

Како одигра екипата тогаш кога најмногу требаше за управата на клубот значи дека дошле до раскрсница. Односите со РФМ од корисна соработка дојдоа до момент кога "заедно" веќе нема да ја има и тука "љубов" нема да има уште долго време. Полошо секогаш може да биде.

Тренерско-играчкиот дел доби слобода да работи како што мисли дека треба, немаше плеткање на управата во тоа што се работеше, резултатите беа тие по кои ќе се мери успехот.

Претседателот на клубот, Ристо Чокрев, е најкомпетентен во моментов да коментира какви ќе бидат односите со РФМ и кои се клупските планови.

"Вардар победи и сега е блиску до титулата, но јас нема да му ја честитам победата. Премногу работи се случија во претходницата на овој меч за да биде се спортски и да си подадеме рака.

Се чини ќе успее сценариото кое го форсира Вардар. Да биде само Вардар, да се има само еден клуб и се друго да не постои. Систем кој функционираше довчера во женскиот ракомет, само Кометал и никој друг. Систем кој е поддржан и од генералниот секретар Марјан Начевски, комисиите, судиите. Ние неколку години им ги мрсевме сметките, создадовме клуб кој не функционира по нивните правила на игра, покажавме дека може и поинаку да се работи.

Но... ќе видиме дали ќе продолжиме така.

Сега кога имаат апсолутна власт во РФМ, прашање е дали тоа вреди. Видовте што се случи кога требаше да се игра. Менуваа термини, манипулираа со комисии, прописи, одолговлекуваа и на крајот дојде ред да играме, кога ние имавме многу повредени играчи. Настрана се, имаа и великодушна поддршка од судиите кои упорно го одржуваа во живот кога имавме водство, направија се за да поведе, а по тоа беше лесно", вели претседателот на Металург, Ристо Чокрев.

Ова е само првиот дел од приказната, причини за поразот се бараат во сопствените редови.

"Отсуството на два-три играчи не смее да биде оправдување за играта која ја прикажавме. Ако толку се зависи од два играчи, зошто тогаш ги чуваме другите? Сигурно не за да одиграат вака како што одиграа. Оваа екипа не е од вчера. Се создаваше неколку години, за да пружи вистинска борба, кога најмногу треба. Со Амичитија и посебно со Вардар. Видовме како вратија. Без борбеност, без жестина, храброст...

Сите имаа своја шанса, видов кој колку пружи и многу од овие играчи следната година сигурно нема да бидат во Металург. Не заслужуваат и нема да бидат дел од иднината на овој клуб. Имаа шанса да излезат од просечноста, да покажат дека се вредни за поголеми дострели...еве што покажаа.

Не направивме наша игра, цела година. Игравме на бранови, десет минути добро, дваесет слабо, десет лошо... и така. Нормално, сезоната уште не е завршена, стручниот штаб и играчите имаат шанса да ме разубедат. Да направат игра со која ќе го победат Вардар девет разлика. Тогаш јавно ќе се извинам што сум се посомневал", вели Чокрев.

Како ќе биде натаму, ќе покаже времето, од Металург велат дека овде не застанува времето.

"Ние себеси се гледаме како брана која стои меѓу македонскиот ракомет и потоп. Ако не сме ние, остане ли Вардар сам, како што сакаат и во тој правец работат многумина, целиот ракомет ќе се удави. И ќе има силен Металург и следната година, му се допаѓало тоа некому или не. И не само тоа, ќе настојуваме и да се најде начин да се 'дигне' од пепел и некој друг тим. Да не се решава се на два меча, каде што можат да пресудат судии, комисии или слично", вели Чокрев.

Очигледно, ќе имаме многу што да чуеме од "Автокоманда" следниот период.

Вардар Про остана на првата позиција

Во ракометниот шампионат, во 20. коло, Вардар Про очекувано триумфираше над Винарска визба Тиквеш со 39:22 и остана на првата позиција на табелата.

Вардар Про има предност од три бода пред единствениот ривал Металург, кој се радуваше против МРК Вардар со 37:24.

Во мечот за опстанок Борец Младост ја совлада Преспа со 29:22, па сега има бод повеќе од конк*рентот и е на седмото место што обезбедува натамошен настап во Супер лигата.

Ракометарите на Пелистер го дополнија успешниот ден за битолските екипи со победа кај Тинекс Пролет со 27:20.

Samo napred vardare!!!

На Веселин Вујовиќ му пропаѓа инвестиција вредна 350.000 евра?!

Тренерот на машкиот ракометен прволигаш Вардар Про, Црногорецот Веселин Вујовиќ, деновиве има мака целосно да се посвети на клучниот меч на неговиот тим против Металург, кој треба да го даде новиот шампион на Македонија. Причина за тоа се големите проблемите кои ги има со својата инвестиција во српскиот град Шабац, каде што со години настапуваше во дресот на некогашниот европски шампион Металопластика, кои се закануваат целосно да го банкротираат.

Според пишувањата на српскиот весник „к*рир“, Вујовиќ и неговиот некогашен соиграч Бранислав Ѓукановиќ, можат да останат без повеќегодишното вложување во спортски комплекс вреден повеќе од 350.000 евра. Тоа може да се случи поради промените во Урбанистичкиот план на Шабац поради кои Вујовиќ и неговиот партнер веќе поднеле кривични пријави против одредени локални функционери, кои засега седат затскриени во полициските фиоки.

Инвестицијата на тренерот на Вардар Про почнала уште во 1992 година преку фирмата „Марбо“, која склопила договор со спортскиот сојуз на Шабац за заедничко вложување за изградба на спортски комплекс.

- Ѓукановиќ и јас целиот свој капитал заработен со играње во странство сакавме да го вложиме во нашиот Шабац и тоа во спортски комплекс по принципот „ние парите, вие земјиштето“. Тоа веднаш беше промовирано во проект на деценијата. Договорот предвидуваше изградба на два базени, тениски терени, деловен објект и ресторан. Сè беше добро додека ние дававме пари и додека не потрошивме во тоа време 650.000 германски марки. Е, после тоа општинските моќници почнаа да ја стопираат работата со разни оправдувања. Сето ова е навистина непријатна ситуација - изјави за „к*рир“ тренерот на Вардар Про, Вујовиќ.

Стојановиќ преку Катар до Вардар

Раде Стојановиќ, чиј репрезентативен статус стана нејасен по конфликтот и наводната физичка пресметка со селекторот Илија Темелковски за време на СП во Хрватска, следната сезона би требало да се врати во Македонија, по седум години интернационална кариера. Се очекува поранешниот лев бек на Пелистер да го облече дресот на Вардар, откако веќе имал прелиминарни контакти со претседателот Михајло Михајловски. Во меѓувреме, Стојановиќ треба да замине на едномесечна печалба во Катар за да му помогне на тимот на Ал-Рајан во тамошниот суперкуп.
По заминувањето од Битола, Стојановиќ прво го носеше дресот на Тримо Требње, а потоа стана еден од клучните поединци во сега веќе пропаднатиот проект Голд клуб, кој прв ја начна доминацијата на Целје на домашната сцена. Оттаму си замина по завршувањето на минатата сезона и оттогаш кариерата му е во застој, прво поради погрешниот избор на новиот клуб, шпански Октавио Пилотес, а потоа не се изнаигра ниту во Горење, кој не му го продолжи договорот зимоска.



Leleee zakooonnn so Mojsovski rastur ke pravat