Франција втор душман во ЕУ ???

   Засилувањето на поддршката од Франција за Грција, велат дипломатите, настанало пред Бук*решт кога била договорена зделката за купување француско оружје за грчката армија

Откако францускиот претседател Никола Саркози, на крајот од минатата недела, во грчкиот Парламент изјави дека започнува нов сојуз помеѓу Франција и Грција, Република Македонија де факто доби уште еден непријател на патот кон Европската унија. Франција на 1 јули ќе го преземе претседателството со Унијата што значи дека главните иницијативи за европроширувањето во наредните шест месеци ќе потекнуваат од оваа земја. Саркози по средбата со грчкиот премиер Костас Караманлис, рече дека Франција целосно ја поддржува Грција во спорот со името.

"Сакам да знаете дека ние ја избравме Грција и дека нема да го смениме нашиот став", рече Саркози и додаде дека ПЈРМ ќе влезе во ЕУ и НАТО во "добри времиња", односно кога ќе се реши проблемот со името.

Саркози во името на Франција и даде огромна поддршка на Грција на Самитот на НАТО во Бук*решт, а дипломатски извори со кои разговаравме велат дека ваквата поддршка била испазарена уште пред Самитот.

"Кога ќе го преземе претседателството со ЕУ, Франција ќе ги става сите можни забелешки и ќе ги лови сите грешки за да не добие Македонија датум за преговори и со тоа да се засили евроскептицизмот во земјата", велат дипломатски извори и додаваат дека сега настапува лош период за Македонија, бидејќи со ова Грција купува плус шест месеци кои ќе бидат без никаков напредок на патот кон ЕУ. 

Ваквиот настап на Саркози со толку силна и на моменти несфатлива поддршка за Грција, велат дипломати, е резултат на договорена голема зделка за купување француско оружје. 

"Грција поддршката, всушност, ја доби со пари, велејќи, поддржете не да ја блокираме Македонија, а ние вам ќе ви дадеме пари", објаснуваат истите дипломатски извори.

Се работи за зделка за оружје вредна четири милијарди евра. Деталите биле утврдени неколку дена по Бук*решт, кога грчкиот министер за одбрана Евагелос Маимаракис во Париз имал средба со Саркози која невообичаено траела дури три часа. Главен дел од зделката за оружје е набавката на воени авиони. Тендерот за авионите се уште не е финализиран, на него се пријавени Еурофајтер (каде Франција има учество), францускиот производител на борбени воздухоплови Рафал, како и американската компанија Боинг со Ф-18. Во коментарите за оваа зделка во француските медиуми дури излегоа информации дека Грците имале намера да му подарат на Саркози и остров.

Оттука многу е јасно нагласеното свртување на француската политика. Кога македонскиот министер за надворешни работи Антонио Милошоски во февруари беше во посета на Париз, неговиот француски колега Бернар Кушнер рече:

"Франција ја поддржува Македонија на патот кон ЕУ и НАТО. Ние сме подготвени да работиме заедно во процесот на приближување кон евроатлантските структури. Македонија, која е француски пријател, претставува вистински пример во комплицираниот балкански регион. Прашањето за името е билатерално и треба да биде решено помеѓу двете земји". 

Сепак, дипломатите велат дека вистинската порака зад официјалните изјави која подоцна им била соопштена на нашите власти е: "Ние го разбираме вашиот проблем, но кога се работи за Атина обратете се на друго место". 

Најголем парадокс во оваа надворешно - политичка игра, велат дипломатите кои ги консултиравме, е тоа што француската држава почива на тројното мото "Слобода, Еднаквост, Братство", а поддржуваат земја која на Македонците им го негира основното право - правото на самоопределување. 

"ВЕСТ" побара од француската амбасада коментар во врска со искажаната силна поддршка на Саркози за Грција од една и убедувањето на тукашните француски дипломати дека Франција е пријател на Македонија од друга страна. За жал, до затворањето на весникот не добивме одговор. 

(Д.Д.)

***

СМК: Саркози се солидаризира со геноцидот во Грција

Веднаш по изјавата на претседателот на Франција Никола Саркози реагираше Светскиот македонски конгрес оценувајќи ја оваа изјава како антимакедонска:

"Наместо да побара извинување од Атина за грчкиот геноцид врз Евреите, кои најчесто се иселувале во Франција, францускиот претседател сега се солидаризира со грчкиот геноцид врз Македонците во егејскиот дел. Саркози, кој самиот е Евреин, по потекло од Солун, е срам за Евреите од целиот свет", се вели во соопштението на СМК.

За СМК интересно е тоа што француските дипломати во земјава не убедуваат во големото пријателство на Франција кон Македонија, а францускиот претседател Никола Саркози јавно ја поддржува Атина во нејзината намера за промена на нашето име.

***

Грција го излажа Саркози дека дедо му е Грк

Една од причините за силната поддршка на Саркози за Грција е и тоа што неговиот дедо, по мајка, наводно, бил Грк. За ова многу пишуваа и француските и грчките медиуми, а кај нашиот јужен сосед дури излезе и книга со наслов "Саркози од Солун". Саркози самиот повеќепати споменува дека книгата била почест за него и затоа тој морал да ја поддржува Грција. Но, македонската дијаспора веднаш го постави прашањето дали навистина дедо му на Саркози бил Грк, велејќи дека тој не ги знае историските факти. Дедото по мајка на Саркози Бенедикт Малах со оригинално име Арон Малах и прекар Бенико се родил во 1890 година во сефардска еврејска заедница во Солун. Во 1904 година тој со мајка му се преселил во јужен Париз каде се запишал на престижниот интернат "Лисе Лаканал". Во 1890 година Солун бил во Отоманската Империја, каде и останал се до 1913 година кога Грција го окупирала егејскиот дел од Македонија. Татко му на Саркози, пак, има унгарско потекло.

***

Франкофоните молчат

Културните врски помеѓу Македонија и Франција се силно развиени и влечат длабоки корени. Франција преку разни организации е присутна во Македонија, посебно во културата и образованието, каде има разни проекти финансирани од француската Влада. Неколку македонски интелектуалци се носители на ордени на Француската Република, како докажани и ценети франкофони кои имаат професионални и други врски со Франција. Интересно е тоа што ниту еден од македонските интелектуалци - франкофони не реагираше во јавноста на ваквите изјави на францускиот претседател. http://www.vest.com.mk/default.asp?id=152639&idg=8&idb=2395&rubrika=Makedonija

Внеси реплика	страница 12 >
Tweet