ИЗБОРИ 2009 - генерална дискусија

Анкета: Паѓа ли рејтингот на ВМРО-ДПМНЕ?

Доколку утре се одржат парламентарни избори, според анкетата на Центарот за истражување и креирање политики, за ВМРО-ДПМНЕ би гласале 30,9 отсто од испитаниците, за СДСМ 19,7, а за ЛДП 1,5 отсто од испитаниците.

Во претходна анкета, пред еден месец, направена од американскиот републикански институт ИРИ, ВМРО-ДМНЕ имаше поддршка од 38%, додека СДСМ имаше поддршка од само девет проценти.

Од партиите од албанскиот блок за ДУИ би гласале 11,9 отсто, за Нова Демократија 8,9, а за ДПА 3,5 отсто од испитаниците.

Според анкетата на Центарот за истражување и креирање политики спроведена на 14 и 15 февруари на примерок од 1.100 лица, за Ѓорѓе Иванов на следните претседателски избори би гласале 30,5 отсто од испитаниците, за Имер Селмани 18,8 отсто, за Љубомир Фрчкоски 15,6, за Агрон Буџаку 10,9, за Нано Ружин 5,6, за Љубе Бошковски 4,4 и за Мируше Хоџа. 2,7 отсто

Позитивно мислење за Иванов имаат 37,5 отсто од испитаниците, за Селмани 32,1 за Бошковски 25 отсто, Фрчкоски 19,8 отсто, 18,1 отсто, Ружин 14,3 и за Мируше Хоџа 9,3 проценти.

За сите кандидати, освен за Иванов и за Селмани, над 50 отсто од испитаниците имаат негативно мислење. За Мируше Хоџа и Љубомир Фрчкоски негативно мислење искажале 61 отсто од анкетираните. Следуваат Нано Ружин со 57,9 отсто, Агрон Буџаку со 57,7 и Љубе Бошковски за кого 54,7 отсто од испитаниците имаат негативно мислење. За Ѓорѓи Иванов 45,1 отсто од испитаниците имаат негативно мислење, а за Имер Селмани 33,7.

И на претседателските избори економијата останува да биде најголем приоритет за граѓаните, иако претседателот има многу мали ингеренции на ова поле. Дури 51,1 отсто од испитаниците сметаат дека економијата треба да е приоритет за новиот претседател. Втор по важност приоритет за 27 отсто од испитаниците е влезот на Македонија во ЕУ и НАТО. Меѓуетничките односи како приоритет ги сметаат 11 отсто, решавање на спорот со името е приоритет за 7,4 отсто од испитаниците. Последен приоритет на листата е визната либерализација која за битна ја сметаат 2,5 отсто од испитаниците.

Личниот контакт меѓу избирачите и кандидатите го сметаат за најбитен составен дел на кампањата односно за него се изјасниле 40,8 отсто од испитаниците.

Јавната дебата меѓу кандидатите е битна за 39,4 отсто од анкетираните. Големите митинзи излегуваат од мода и за овие избори тие ќе бидат битни за само 9,9 отсто од гласачите. Исто така мал е процентот на испитаниците - 8,1 отсто, кои сметаат дека платеното политичко рекламирање треба да се содржи во политичката кампања.