Дали сме наследници на АнтичкитеМакедонци

Светскиот Македонски Конгрес смета дека името на државата е затворено со референдумот од 8 септември 1991 година.

На овој датум народот и граѓаните во апсолутно мнозинство се изјаснија за “самостојна и суверена држава Македонија“ без додавки и придавки, а одлуката на референдумот е задолжителна. Оттука, промената на државното име претставува велепредавство, а заговорниците на таа политика велепредавници, со што не се прави поделба меѓу граѓаните туку законска диференцијација што подлежи на најстрога санкција.

“Обвинувањата за таканаречена “хунза“ и “букефал“ политика, односно “антиквизација“ и “букефализација“ на земјата, оркестрирани и платени од исти центри, претставуваат дел од заговорот за промена на државното име Македонија. Во Македонија не живеат ниту “етнички Словени“ ниту “етнички Хелени“ кои во историјата никогаш и не постоеле, туку етнички Македонци, бидејќи и словените и хелените се само и ништо друго освен културен идентитет на македонскиот етнитет“, се вели во соопштението од СМК.

Исто така од СМК додаваат дека етнологијата денес не претставува чиста генетика туку пред се култура, но интегралната историја на Македонија од пред нашата ера до денес им припаѓа на Македонците и тие на тоа се горди.

“И кога поменот за тој дел од историјата го одржуваат со споменици, и кога културата и историјата на Македонија без претенциозности за ексклузивитет ги споделуваат со сите балкански демоси како современи политички нации во чијашто основа е македонскиот етнос“, истакнато е во соопштението.

ВМРО-ДП: Марсовци се оние кои се откажуваат од идентитетот

ВМРО-ДП се придружува кон ставот на Светскиот Македонски Конгрес кој смета дека името на државата е затворено со референдумот од 8 септември 1991 година, и дека, промената на државното име претставува велепредавство, а заговорниците на таа политика се велепредавници.

“Оние кои бараат македонскиот народ да се откаже од својот идентитет, тоа нека го направат само за себе, нека се прогласат за марсовци“, се вели во соопштението од ВМРО-ДП.

ВМРО-ДП ги повикува институциите на ситемот да реагираат во доменот на своите законски овластувања и обврски, конкретно обвинителството на Македонија, да утврди дали непостојат елементи кои се санкционираат според КЗ а кои се однесуваат на уривање на уставниот поредок на Македонија.

НДМ: Преседателските кандидати неизбрани го рушат дијалогот

Народното движење за Македонија (НДМ) изразува длабоко жалење од фактот што кандидатите за претседател уште неизбрани почнаа да го рушат дигнитетот и да ја девалвираат нејзината институционална политичка позиција.

“Наместо да бидат недопирливи во оваа фаза на претседателската кампања за странските дипломати особено по најчуствителните прашања што ја оптеретуваат македонската политичка реалност, тие го прават токму спротивното, а дополнително на јавната сцена бесмилосно се обвинуваат едни со други со што севкупно ја ослабуваат позицијата на Македонија по тие прашања. Апсурдот е дотолку поголем што македонските кандидати за претседател одат на поклонение кај странските дипломати додека кандидатите за претседател од македонските албанци ги пречекуваат странските дипломати во своите седишта“, велат од НДМ.

НДМ ги повикува претседателските кандидати да престанат да ги девалвираат и оние вредности кои едвај опстојуваат во македонската политика а кои се однесуваат на угледот на државата.

“За НДМ е несфатливо што може да очекуваат во разговор на пример со грчката амбасадорка, дали помош од тајните служби од Грција кое нешто веќе е видено пред петнаесетина години на македонската политича сцена или помош за одредени европски фондови со кои Грција како ментор на тие средства не уценува. Останува должноста политичките кандидати за претседател на државата да и одговорат на македонската јавност“, додадено е во соопштението.