МАКЕДОНСКА БЕРЗА

Комисијата за хартии од вредност утврди дека брокерите од брокерската куќа “Мој Брокер“ АД Скопје не се придржувале кон инструкциите дадени од клиентите и непотребно го одложувале извршувањето на налозите, иако условите на пазарот на хартии од вредност дозволувале нивно реализирање.Согласно Законот за хартии од вредност, за сторените повреди КХВ на „Мој брокер“ и изрече привремена забрана за вршење на сите услуги со хартии од вредност во рок од 30 работни дена. Брокерската куќа треба да плати и глоба во висина од 4.000 до 5.000 евра, а одговорното лице на „Мој Брокер“ казна во износ од 1.000 до 2.000 евра. Оваа брокерска куќа во моментов не врши услуги со хартии од вредност поради предходно изречена санкција од КХВ за ценовни манипулации.

КХВ даде повеќе одобренија за издавање нови емисии на акции и тоа на: „Бетон“ АД Скопје (21.756 обични акции по продажна цена од 255,65 евра по акција);  Винарска визба „Тиквеш експорт-импорт“ АД Скопје (63.950 обични акции со вкупна вредност од 6 милиони евра); „Евроинс осигурување“ АД Скопје (2.786 обични акции по продажна цена од 41.500 денари по акција);  Друштво за осигурување АЛБСИГ АД Скопје (225.000 акции  во износ од  2.250.000 евра); Друштво за осигурување „Сигал“ АД Скопје (156 акции).