Целта на фестивалот е да се нагласи големото значење на природните, органски производи за унапредување на здравјето на сегашните и на идните генерации

Во последно време се повеќе земјоделци произведуваат органска храна. Доказ за тоа е што за една година за 2.300 хектари е зголемена површината за органско производство на житни култури. Ова беше причина за одржување на првиот фестивал на органска храна во Македонија, на плоштадот Македонијаа под мотото Од природата за менее, во организација на Град Скопје и Министерството за земјоделство, шумарство и водостопанство во соработка со Федерацијата на производители на органски производи. На еднодневниот фестивал, се претставија 30-на производители на органска храна од земјата и регионот, кои на Скопјани им овозможија дегустација на вкусна, природна, органска храна. Целта на фестивалот е да се нагласи големото значење на природните, органски производи за унапредување на здравјето на сегашните и на идните генерации, но и одржувањето на биодиверзитетот.
- Минатат година, Министерството за земјоделство, шумарство и водостопанство го евидентира најголемиот раст во овој сектор и по бројот на производители и по сертифицираната производствена површина. Од 321 сертифициран производител на органска храна во 2009 година, лани нивниот број достигна 562. Сертифицираната производствена површина само за една година се зголеми повеќе од три пати, односно околу 1.400 хектари во 2009 на 5.225 хектари минатата година, истакна министерот за земјоделство, шумарство и водостопанство, Љупчо Димовски.

Тој додаде дека за една производствена година евидентиран е голем раст и кај органското лозарство, производството на органско овошје и органско сточарство.
Како резултат на зголемувањето на интересот на органско производство и на бројот на фармери, Владата на Република Македонија и ресорното министерство ја зголемија финансиската поддршка. Лани финансиска поддршка во земјоделството на органските производители изнесуваше 1.161.000 евра. Годинава од буџетот за поддршка на органското производство одвоени се повеќе од еден милион и 780 илади евра.

Македонија со издвоените средстава и природниот потенцијал за развој на производство на органска храна, оправдано е еден од лидерит во регионов за производство на здрава храна. (А.И.)



АНКЕТА: ДАЛИ КОГА КУПУВАТЕ ПРОИЗВОДИ ВНИМАВАМЕТЕ ДАЛИ СЕ ОД ОРГАНСКО ПОТЕКЛО ИЛИ НЕ?

Александра Мартаќ-Станковиќ
Кога купувам производи за дома секогаш гледам дали се од органско потекло. Тоа ми е најважно првенствено заради децата. Најважна ми е грижата за нив да внесуваат здрава храна и здраво да растат. Иако таа храна е поскапа сепак нивното здравје ми е на прво место. Но како и да е ако нема за нас, за нив мора да се купи.

Марија Илиеска
Најчесто за дома купуваат моите родители кои се грижат да јадеме квалитетна храна. Органска храна обично во супермаркетите приметувам дека има и се надевам дека секој ја купува за дома. Но, кога би се грижела за моето семејство претпоставувам кога би била во добра финансиска можност би купувала органска храна, затоа што знам дека таа е поздрава за разлика од таа што се одгледува со пестициди.

Елена Арсевска
Моите родители се тие кои што пазаруваат и го обезбедуваат со храна семејството, но кога имам прилика да пазарувам за мене лично секогаш се трудам да биде храна која ги задоволува критериумите за безбедност, пред се да се почитува рокот, да го прочитам составот на храната, бидејќи тоа се некои општи принци. Забележувам низ градов има продавници и во супермаркетите се нуди некоја храна се декларира како органска, меѓутоа тоа е во мало количество.

Тања Ангова
Секогаш гледам дали е од органско потекло, гледам дали е со поминат рок, а многу ми е битно да ги содржи оние хранливи состојкои кои што се неопходни за здравјето на човекот. Секој би требало да внимава на тоа. Но, најтрагично е што целата таа материја односно органската храна која се продава по ексклузивните продавници е недостапна со цените за обичниот народ, па неможе секој да си дозволи здрава исхрана.