СМРТНА КАЗНА?!

Во најголем број случаи (од морален аспект) сум против смртна казна, како начин на казнување. Никој нема право да одземе туѓ живот, па макар и да му го подарил (мислам на родител), и околу тоа немам дилеми. Статистиките покажуваат дека во најголем број од државите каде се применува смртна казна, таа воопшто не придонела да се намали бројот на сторени злодела, туку тој број си останува константа. Казната не смее да биде одмазда (колку и да е оправдана), туку превенција... Понекогаш постои и опасност на смрт да биде осудено невино лице. Што тогаш?.. Ако го убиеш убиецот, значи ли тоа дека жртвата е осветена?... Или на жртвата тоа веќе нешто и значи, па и на нејзините најблиски?.. Оној што ќе ја изврши осветата (или пресудата) сам од себе прави убиец и тоа свесно!..

Најсоодветна казна би била доживотен затвор без можност за помилување (за најтешки злосторства), општествено корисна работа и тоа од оние најтешките... а за случаите на педофилија, силување, инцести и др. сексуални злосторства, кастрација, како што веќе се применува во некои земји...

Од друга страна, кога ќе слушнам дека некаде некој педофил се изживувал врз 4-годишно девојче, мајка си ја продавала ќерката за пари, сериски убиец убил десетици невини луѓе на грозоморен начин, татко цели 20 години сексуално злоупотребувал ќерка, и направил деца и ја држел во темница... тогаш прво што ми паѓа на памет е смртна казна!... Или во најмала мерка, некое физичко мачење слично на она што тој  им го правел на жртвите...

Ама се прашувам дали тоа е казна за злосторникот, поголема од казната на совеста, ако воопшто тие луѓе имаат такво нешто...