FENIX-5

Најуспешни првоаприлски шеги

Британското издание на магазинот „Метро“ завчера објави избор на најдобри првоаприлски шеги во кои поверувале илјадници луѓе, пренесува Макфакс. Меѓу нив е таа на британскиот весник „Гардијан“, кој во 1977 година на дури седум страници објавил репортажа за Сан Серифе, измислена островска држава во Индискиот Океан. Репортажата имала комплетен опис на двата главни острова, наречени Јупер, Каисе и Долен Каисе, за измислената престолнина Бодона, па дури и за водачот - генералот наречен Пика. Тој ден, но и многу денови подоцна, редакцијата на „Гардијан“ била затрупана со телефонски повици од читателите што поверувале во репортажата и сакале да дознаат повеќе за оваа непостојнка островска држава. Новинарот на Би-би-си, Ричард Димблеби, пак, во 1957 година во својата емисија објавил дека Швајцарците ги берат шпагетите на дрво. Неверојатно, но потоа се јавиле стотина луѓе што се интересирале каде можат да набават такво дрво. Во 1973 година Би-би-си радио на гости го поканил лекарот што на нацијата и' објавил дека на црвенокосите луѓе им се заканува заразна болест наречена „дач елм дисис“, односно болест на холандскиот брест. Во 1997 година на многу корисници им бил испратен имајл за тоа дека на тој ден интернетот нема да работи бидејќи роботите ќе ја прегледуваат неговата содржина и ќе го чистат од страниците што веќе не се во функција. Веста дека американската држава Алабама донела одлука да ја смени вредноста на математичката константа Пи (3,1415926...) во библиската бројка три, всушност било шега на едно научно списание и во таа шега поверувале десетици илјади луѓе. Британскиот астроном Патрик Мур во 1976 година на Би-би-си радио објавил дека ретката положба на планетите привремено ќе ја намали гравитацијата на Земјата, поради што сите луѓе ќе имаат можност да лебдат. Шегаџијата Порки Бика во 1974 година запалил неколку стотици гуми на врвот на вулканот Монт Едгекумбе на Алјаска. Иако овој вулкан последен пат еруптирал пред повеќе од две илјади години пред Христос, густиот црн чад што се издигнал високо на небото ги преплашил жителите.