МАКЕДОНСКА БЕРЗА

МБ избра осумте странски компании, кои според неа би можеле да бидат нејзини стратешки инвеститори. Неофицијално се работи за Германска берза, NASDAQ - американска асоцијација за трговска размена, виенска, њујоршка, загрепската, љубљанска, полска и прашка берза. МБ до први декември ќе им испрати покана на овие осум берзи за купување на контролен пакет акции од 60%. Откако оние кои ќе ја прифатат поканата ќе испратат понуда, ќе се избере најповолниот купувач. Доколку пак, се јават повеќе берзи, во тој случај ќе се изберат трите најповолни од кои подоцна ќе се избере.

МБ нуди над 60% од акциите, со можност тој процент да биде зголемен. Продажбата треба да заврши до март. Единствена пречка засега бил законот, според кој никој не смее да поседува повеќе од 10% од акциите на берзата. Но, предлог-измените на овој закон веќе поминале на владина седница, и се очекува до Нова година законот да биде променет да се овозможи продажба на МБ.

Како причина за продажбата на берзата се наведува падот на акциите на светските берзи и глобалната економска криза, како и фактот дека со МБ лошо се раководи и никогаш досега, директорите, не ги искористија сите финансиски инструменти кои им се на располагање за да го спречат берзанскиот крах во Македонија.

Акционерите на Берзата веќе се подготвувале да го групираат капиталот во очекување на понуди од стратешки инвеститор во период кога вредноста на акциите драматично паѓа, се најавува тоталната неликвидност на пазарот на капитал и вредноста на берзанскиот индекс е преполовена во однос на истиот период, лани.