Случајот СВЕДМИЛК и фармерите

31.03.2009 11:27

Бугарска фирма којашто сакала да гради млекарница во Битола е заинтересирана за преземање на „Сведмилк“, објави денеска „Дневник“.

Според неименувани извори на весникот, деновиве „Хипо Алпе Адрија“ требало да ја активира хипотеката на имотот на млекарницата, но поради отсуство на директорите на фирмата, засега се е одложено.

Менаџментот на Хипо веќе имал преговори со раководството на млекарницата, но се уште не е донесена одлука за одземање на опремата, која се наоѓа во млекарницата и е во употреба.

Во „Сведмилк“ велат дека појавувањето на бугарската компанија е една од причините зошто сегашниот сопственик на млекарницата Моше Баум последниве десетина дена стагнира со исплатата на парите на млекопроизводителите на кои им должи над четири милиони евра.

Истовремено не демантираат дека се појавува нов кандидат за скопската млекарница и ја потврдуваат информацијата дека Моше Баум се плаши дека може да остане без своите пари кои досега им ги исплаќаше на млекопроизводителите.

Моше Баум во меѓувреме ги расчистил сите долгови кон рентакар-агенцијата и секој ден се пријавува во полиција.

Според извори на „Дневник“, бугарската фирма имала капитал од само два милиона евра, а една домашна банка требало да им одобри кредит на уште два милиона за да им ги исплатат сите пари на млекарите.