Посетување психолог или психијатар

Психотерапијата подразбира процес во кој клиентот треба да остане подолго време, само на тој начин ќе се предизвика трајна промена во личноста, клиентот може да добие многу - да креира едно поинакво "јас", ќе научи да презема одговорност за сопствениот живот

Ако некогаш одењето на психијатар и психолог беше табу-тема и нешто на кое многу луѓе гледаа со резерва, денес е многу поинаку. По истражувањето кое го направи редакцијата Вечер, дојдовме до заклучок дека денес на психијатрите во Македонија и не им е толку лошо. Кога пробавме да стапиме во контакт со некој од психијатрите и психолозите добивме објаснување дека тие се презафатени со своите пациенти и дека треба да закажеме термин, за да разговараме со нив.

Она што како потврда стои дека Македонците посетуваат психијатри, се и многуте портали на интернет на кои мислењето по оваа прашање е најчесто позитивен.
- Јас разговарам со психотерапевт и можам да кажам дека откако почнав со тој процес се препородив. Се менувам за 360 степени, свесна сум за тоа, ја чувствувам секоја промена на себе како да гледам филм, прекрасно е чувството и сознанието дека правам нешто добро за себе, дека не тапкам во место со милијарда проблемчиња во глава и на срце. И секогаш со душа ја чекам таа средба, имам фантастичен психотерапевт кој не би го менувала ни за милион долари, вели нашиот соговорник.

Според гешталт-терапевтот Каролина Костадиноска, нема ништо срамота во одржување на менталното здравје туку баш напротив, може да имаме само бенефит прво лично за нас, а со тоа и нашето семејство па и заедницата во која живееме и делуваме. 
- Статистичките податоци велат дека најчести пациенти кои бараат помош се од 30 до 45-годишна возраст, од кој само 95 посто се жени. Од нив најмногу доаѓаат на терапија сами отколку во пар, вели психотерапевтот Каролина Костадиноска.

Причините поради кои најчесто пациентите бараат помош се проблеми како што се стрес, фобија, повлеченост, несигурност, зависност, чувство на осаменост, чувство на вина, недостаток на самодоверба, незадоволство од себе, чувство на инфериорност, нереални очекувања и барања од себе си, потешкотии во односот со спротивниот пол, сексуални дисфункции, неадекватен успех, конфликтни ситуации во семејството, разни видови на нарушувања во однесувањето и навиките итн., додава Костадиноска.

Според неа во последните две до три години се насетува дека е намален бројот на негативните размислувања околу одењето кај психолог и психијатар, додавајќи дека луѓето се уште не ја знаат вредноста на менталното здравје.
- Да се побара помош од психолог и психијатар не значи да се биде слаб, значи дека си свесен, потенцира Костадиноска.

пренесено  од Вечер