Веронаука!!!

Веронауката од септември стартува во основните училишта. Владата ќе дава бесплатни учебници за петтоодделенците, кои ќе бидат прва генерација ученици по новите наставни програми.
"Се прават последните подготовки. Подготвени се пет наставни програми за сите 5 конфесии наведени во Уставот. Посебни учебници ќе има за православна, католичка, исламска, еврејска и евангелистичко-методистичка веронаука. Книгите, најверојатно, ќе се даваат бесплатно", тврдат во Министерството за образование.
Учениците од петто одделение кои од наредната година ќе изберат исламска веронаука, во училиштата ќе учат да го обожаваат Алах. Според наставната програма која ја подготви Бирото за развој на образование и професори од исламските училишта, децата на десет години ќе треба наизуст да ги знаат молитвите и да веруваат дека Мухамед е последен посланик на земјата.
Учениците од муслиманска вероисповед на часовите ќе учат како да му се заблагодаруваат на Алах, да ги развиваат комуникативните способности, првин со Алах, а потоа и со сите луѓе.
"На крајот на школската година, учениците ќе треба да веруваат дека сета природа и нејзините убавини се создадени од Алах", е наведено во програмата.
За разлика од нив, децата кои ќе учат православна вероисповед не треба да веруваат дека целата природа ја создал Господ. Во програмата стои дека тие треба да го знаат библиското кажување за создавањето на светот. Треба да разберат што е тоа молитва, да ги препознаваат и ги споредуваат молитвите.
Веронауката ќе ја предаваат дипломираните теолози, а запознавањето со религии дипломирани филозофи и социолози.
Уставниот суд, по два и полчасовна расправа, не донесе одлука дали воведувањето на веронауката е уставно или не. Причината за недонесувањето одлука беше немање на мнозинство од 5 гласа. Ќе се чека да се докомплетира Судот за да се разгледа повторно иницијативата на Либерално-демократската партија и на адвокатот Петре Илиевски, и да се утврди дали воведувањето на веронауката во училиштата е уставно или не. (Р.Ф.)