Секогаш и секаде читаме за оние мали но исклучително важни совети коишто ќе спречат да го закачиме вирусот на грип. Јадете здраво велат... и држете се до овие правила:

- Вежбајте доволно, барем пешачете бидејќи тоа го одржува телото и го јакне вашиот имунолошки систем.

- Конзумирајте доволно зеленчук бидејќи во него ги има сите витамини коишто на вашето тело му се потребни.

- Исто така, внесувајте и доволно овошје бидејќи тоа е особено богато со витамин Ц, којшто е најважен за здравјето.

- Излегувајте често на чист воздух и избегнувајте зачадени простории.

- Потрудете се да немате наметнат или најдобро, било каков стрес.

- Спијте доволно и бидете секогаш одморени.

Овие правила ќе ви ги каже секој доктор пред да ви „шибне“ инекција во газот со предупредување за следниот пат, како да се чувате од грипот. Но, она што е вистински важно е тоа дека пред да ви ја стави инекцијата, тој со памукче ќе ви го намачка местото со алкохол, бидејќи алкохолот дезинфицира, то ест ги убива непосакуваните вируси и сè што ќе се најде на тоа место.

Затоа, ние ви предлагаме да не чекате на инекции, туку веднаш да прејдете на главното, алкохол. Всушност, на англиски, зборот за инекција и за мала чашка ракија е ист - shot. Ако размислите уште подлабоко, дури и кога пиете, можете да ги следите советите на докторот од погоре. Тоа е сигурен начин дека нема да фатите грип.

- Секогаш оставете го автомобилот дома кога одите во кафана (пешачење и вежбање)

- Кога нарачувате ракија, секогаш нарачајте свежа салата (зеленчук)

- Откако ќе прејдете на скара, потрудете се да не пиете чисто вино или обичен шприцер. Нарачајте бунар, во него ставаат портокали или лимони (овошје)

- Ако има услови за тоа, најдете кафана којашто е надвор од градот, во парк или на Водно, во планина (чист воздух)

- Кога ќе почувствувате дека сте испиле „таман“, слободно смејте се и забавувајте се со пријателите, така го елиминирате стресот.

- Кога ќе испиете премногу или барем доволно, секогаш лесно заспивате и можете да спиете со часови (добар одмор)

Ние се одлучивме како ќе го чуваме нашето здравје, а вие како сакате