Создавањето нова песна на Синтезис значи преслушуваме многу материјал. Понатаму, музиката се создава на самите проби, работејќи. Никој не знае што ќе се случи на пробата, дали ќе има нешто интересно или ќе биде обично свирење без некаква визија

Едно име, осум члена, милиони обожаватели. Синтезис - група која е македонски бренд со особен печат врз секој свој проект. Нивните: „Во наше село”, „Помолила Бога Маца”, „Ој девојче, девојче” се само дел од богатиот и препознатлив репертоар. Неповторлив е секој нивен концерт насекаде низ светот: Од Виетнам до Европа, од Австралија до САД. Годинава одбележуваат 15 години од постоењето. На настапите кои следуваат ќе го презентираат документарниот филм по повод јубилејот. Пред следната активност, во име на членовите на Синтезис, разговаравме со Ване Јовчев.

Минатата година, Билјана и Мирјана добија принова. Дали тоа значеше намалување на бројот на настапи или се продолжи да се одвива нормално?

Со секоја почит спрема Билјана и Мирјана и нивните дечиња, Синтезис продолжи да работи и сè да се одвива нормално во однос на исполнување на обврските.

На нивно место имате две нови пејачки кои заедно со Анета ги изведуваат вокалните делници од песните. Врз база на што одлучивте токму нив да ги ангажирате?

Едната девојка, Сузана Јовчева, подолго време соработува со Синтезис и била замена за некоја од девојките кога било неопходно. Теодора, пак е девојка која ни ја препорача еден професор од средното музичко училиште. Таа учи на отсекот за фолклорно пеење и без проблем влезе во оваа работа. Се разбира, и двете мораа многу да вежбаат и работат за да го научат материјалот. Ние останатите членови многу им помогнавме на пробите и го постигнавме посакуваниот резултат.

На домашната Евровизија настапивте со шоу програма во втората полуфинална вечер со новите пејачки. Каква е реакцијата на публиката и кое е Вашето мислење за нив?

Со новите пеачки имавме настапувано и на други места пред домашната Евровизија (пр.настап со Нишката филхармонија минатата година) и може да кажам дека беа одлични. Реакцијата за тој настап, а и за настапот во Универзална сала беше оправдано позитивна. Нашите фанови и вистински пријатели се свесни дека групата мора да продолжи да работи со исто темпо.

Со што како активност во моментов сте окупирани?

Во моментов го доработуваме новото ЦД на Синтезис. Тоа ќе биде избор на најдобрите инструментални композиции во еден албум. Идејата за ова ЦД дојде по неодамнешното освојување на првата награда во категоријата „најдобар инструментален бенд“ во светски рамки. Наградата ја добивме според изборот на едно од најстарите списанија во Канада „Торонто Ексклузив магазин“. За нас наградата е многу значајна и некако не задолжи да го снимиме ова ЦД и го промовираме во светот.

Освен ова ЦД со Вашите најдобри инструментални композиции, дали ќе не почестите и со нов студиски албум, со оглед на тоа што „Identity" го објавивте пред повеќе од година и половина?.

Секако дека сите ќе Ве почестиме со нов материјал, хаха. Инструменталното ЦД најверојатно ќе излезе на пролет. Веќе почнавме да работиме на нов проект за кој понатаму ќе Ве информираме за сите детали. Секако, новиот материјал ќе ја продолжи работата на групата во ист правец. Новите песни овој пат ќе бидат изведени солистички, со придружни вокали (по потреба), во оригинален рустикален стил.

Сами за читателите на ИДИВИДИ откријте им, според кој критериум ги бирате песните за албумите и како се одвива процесот на обработка?

Тоа е огромна тајна, хаха. Се шегувам. Тоа е огромен процес во кој 30-40% од тежината на работата и критериумот го создаваме сите. Преслушуваме многу материјал кој го бараме од најразлични извори. Понатаму, музиката се создава на самите проби, работејќи. Никој не знае што денес ќе се случи на пробата, дали ќе има нешто интересно или ќе биде обично свирење без некаква визија, хаха. Затоа создавањето е многу интересно и моментално, едноставно незаборавно, без оглед на тоа што некогаш пробата трае 4 часа.

Преку музиката ја претставувате Македонија. Колку Вие сте задоволни од публиката и третманот од страна на медиумите во Македонија?

Ако мислите за третманот од публиката ние сме задоволни, иако може да се каже дека некогаш не сме разбрани од сите. Тоа е затоа што овој стил на музика не е комерцијален, или на друг начин кажано не е лесен и певлив со што би заразил поголем број на публика. Сепак, добар дел од публиката ја разбираат нашата порака и сме задоволни. За третманот од медиумите исто така можам да кажам дека голем дел од нив доволно ја емитуваат нашата музика, иако уредниците не ја разбираат. Тие ја пласираат странската музика на прво место пред македонската. Етно музиката ги портретира карактеристиките на нашиот народ, опеани низ нашите песни. Во нив е опишани и опфатен историскиот аспект и затоа медиумски треба повеќе да се експонира не само нашата, туку и музиката на другите македонски изведувачи.