Тројца изрешетани до смрт во Скопје

Парите биле дадени, а 100 килограми хероин не стигнал до нарачателите. Според нашите извори, хероинот за продажба го купиле Јордан Јорданов Ркулот, Владо Андреевски, но и Тони Денковски осомничениот за убиството. Дрогата од овде требала да стигне во Холандија, а од таму во Германија и Австрија но мистериозно исчезнала. Инволвираните останале и без пари и без „роба".

Што точно се случило вечерта во ресторанот „Биг Фиш“. Кој со кого седел на маса. За разлика од информациите кои доаѓаат од подземјето, а речиси се идентични за причините за убиството, а тоа е дека се работи за дрога, за тоа што се случувало пред Денковски да почне да пука кружат две верзии.

Првата е дека Денковски отишол во „Биг Фиш“ на договорена средба. На масата седеле и Андреевски, Ркулот, Милошев и уште една девојка.

Кога Ркулот и Андреевски го известиле Денковски дека дефинитивно нема пари од хероинот зошто робата исчезнала, почнале да се караат. Тогаш Денковски му удрил шлаканица на Андреевски и заминал.

За 20-тина минути се вратил со калашников и пукал во тројцата, а ја поштедил девојката.

Според втората верзија, Денковски седел на друга маса, откако му било кажано дека не е добредојден на масата на велешаните. После еден час го напуштил ресторанот и се вратил со калашников во раце.

Прво пукал во Ркулот па потоа во Милошев и Андреевски. Според нашите извори - Ркулот кој лани беше приведен за врските со Франкфурт мафијата, осуден на 3 години затвор за недозволено поседување оружје, на слобода бил поради добрите врски со луѓе на високи позиции во полицијата.

Соработката почнала по неговото апсење. Често можел да се види и во друштво на обвинители. Засега официјално нема никакви детали за релациите на Милошев - вработен во шестата управа при МВР со останатите кои вечерта биле на масата во Биг Фиш.

Шпекулациите дека токму тој бил линкот со подземјето официјално не се потврдени.