ПРЕГОВОРИ ЗА ИМЕТО - 1

Шефер бара флексибилност од Македонија
Генералниот секретар на НАТО, Јап де Хоп Шефер, уште еднаш повтори дека за надминување на грчко-македонскиот спор за името е потребна флексибилност од двете страни, но дека во голема мера одговорот лежи во Скопје.

„Мора да сфатиме дека нашите пријатели во Скопје сакаат да се вклучат во НАТО, а не обратно. Знаете Грција е внатре, а Скопје не е. Со други зборови, флексибилноста е потребна од сите, но не треба да се заборави ситуацијата дека една земја бара да се вклучи во НАТО. Можеби е тешко да се рече, но во тоа е прашањето“, вели генералниот секретар Јап де Хоп Шефер.

„Јас искрено се надевам дека новата влада, одново под раководство на премиерот Груевски, ќе најде начин да се дојде до решение за прашањето за името. Јас би сакал тоа да се случи уште утре, но за тоа е потребна флексибилност“, вели Шефер во интервју за албанската редакција на Би-Би-Си, објавено на Интернет-страницата на македонската редакција. (Макфакс)