БЕЗ КОМЕНТАР

- Пред почетокот на седницата сакам да расчистам неколку дилеми. Прво, ДУП-овите не се ставени на дневен ред затоа што е лето, зима или есен, туку затоа што имам законска и деловничка обврска, без разлика дали се поднесени од еден советник или од цела советничка група и без разлика од тоа на која партија тие припаѓаат. Второ, да потврдам дека никогаш нема да гласам или да поддржам проекти кои се поврзани со криминалниот "Скопје 2014". Тоа сум го правел и го правам на дело, а не само декларативно. Трето, после се што се изнаслушав деновиве, сакам да потенцирам дека нема да дозволам мојата судбина и судбината на моето семејство да биде тема на политичко профитерство, ниту на мојот СДСМ, а уште помалку на ВМРО-ДПМНЕ - рече вчера Шиповиќ.
- Јас не подлегнувам на притисоци од ниту една страна, тоа досега сум го докажал. Работам според закон и законска регулатива. Да ме интересираа пари и да правев какви било пазари немаше јас и брат ми да лежиме во затвор осум месеци и да чекам текот на судскиот процес да покаже дека нема моја вина, ниту криминал во случајот Претседавач", а потоа да правам пазар за мојата слобода - додаде тој.

Дали Шиповиќ ќе ги поддржи предлозите на ВМРО-ДПМНЕ во Советот на Центар до затворањето на весникот остана непознато поради тоа што тие точки беа предложени од ВМРО-ДПМНЕ и ставени последни на вчерашниот дневен ред. Сепак, со своите изјави на почетокот на неделава претседателот на Советот на Центар потврди дека не е сигурен во лојалноста кон СДСМ.
- И јас го слушам истото. И дека ме купиле со т.н. слобода и дека сум се испазарил, дека ќе дадам оставка, дека ќе гласам против предлозите на Жерновски. Што да ви кажам, изморен сум од се. Ако функционирав порано по 24 часа, сега сум активен едвај по три часа. Истрошен сум и физички и психички. Сите опции се во игра - изјави Шиповиќ пред неколку дена.

Во новите ДУП-ови се предвидува 10-катница на Панорама и надградба на ГТЦ
Измените на деталните урбанистички планови кои ги предложија советниците на ВМРО-ДПМНЕ се однесуваат за ДУП-овите Тасино Чешмиче, Мал Ринг и Водно - Капиштец. Во планот Тасино Чешмиче предвидено е кај Панорама на Водно да се изгради хотел на 10 ката. Се предлага и измена и на плановите Капиштец - Водно и Мал Ринг, каде што за објектот на ГТЦ, освен обнова на фасадата, се предвидува и можност за надградба. 

ФОТО: Ѕ. Плавевски