Брадосан човек во униформа на муслиманската организација ИСИЛ во Ирак, кој во раката држи македонски пасош е на видеото што го објави милитантна група, каде борци од Косово и други муслимански земји се откажуваат од пасошот на земјата од каде доаѓаат.

Под видеото, што групата го поставила на Ју тјуб на 12-ти јуни, пишува дека откажувањето од пасошите е прифаќање на учењето за откажување на националната или етничка припадност, бидејќи Муслиманите се едно тело и нема граници меѓу нив.

Организацијата ИСИЛ е со идеологија да создаде една единствена муслиманска држава и при тоа не бира средства. Со помош на околу 3000 странски војници – џихадисти, со борба успеа да се приближи до главниот град на Ирак, Багдад.

Се проценува дека ИСИЛ успеала да регрутира неколку илјадници муслимани, по пример од Сирија, каде меѓу загинатите борци, имаше неколкумина од Македонија, Албанија и Косово. Се проценува дека само во Сирија се борат околу 600 луѓе од регионот. Некои од земјите од регионот донесоа закон со кој се забрани учество во странски војски.

Македонија нема таков закон, но со последните измени на Кривичниот законик, врбувањето борци за војни во странство стана кривично дело.

Некои од политичарите најавуваат амандман со кој ќе се казнува учеството во конфликти во странство.